Fundashon pa Konsumidó a manda karta pa FLOW pa nan manera inaseptabel di trata ku kliente

Willemstad——Último tempunan konstantemente Fundashon pa Konsumidó  a bin ta risibí kehonan relashoná ku e servisio di kompania di telekomunikashon FLOW. Konsumidónan ta aserká nos ku kehonan ku ta varia for di e servisio ku nan ta risibí di empleadonan na resepshon, e manera ku ta atendé kliente na telefòn, kehonan di kalidat di instalashon, tardansa den reparashon te na e kalidat di e konekshon di internèt i televishon ku nan ta risibí. Tambe tin reklamonan konstante riba e kantidat di MB ku e konsumidó ta risibí versus e loke e ta paga pe. Den e kaso aki nos ta rekomendá e konsumidó pa e ta alerta i keda kontrolá esaki. Esakinan sigur no ta e manera korekto di FLOW pa atendé ku su klientenan. E frustrashon di klientenan ta hopi, sigur si tene kuenta ku e derechi di eskoho di e konsumidó riba e tereno aki ta hopi limitá.  

Teniendo kuenta ku esakinan ta remarkabel i pa Fundashon pa Konsumidó kasi inkomprensibel kon tòg FLOW ta keda hisa tarifa di su servisionan apesar di tur e reklamonan ku nan ta risibí tokante di e kalidat di produkto i servisionan ku e ta ofresé. Aunke di otro banda mester bisa ku e kompania ta aktua konforme lei mirando ku e posibilidat di subi tarifa ta pará den e kondishonnan general di e kontrato ku e ta drenta ku e konsumidó, tòg nos ta puntra nos mes si e subidanan aki ta oportuno  i hustifiká mirando tur e kehonan ku e konsumidó tin relashoná ku e produkto i servisio di FLOW.

Fundashon pa Konsumidó tei pa protehá e konsumidó. Ta p’esei nos ta informá e konsumidó korektamente tokante di su derechi i debernan. Den kuadro di esaki nos a tuma e promé paso kual ta manda un karta pa e kompania di telekomunikashon FLOW. Nos petishon prinsipal ta pa e kompania FLOW reakshoná debidamente den korto tempu kon ta bai atendé e parti di servisio na kliente i mehorá e produkto ku nan ta ofresé. Tambe ta hasi un yamada na FLOW pa rekonsiderá e subida di tarifa.

Aunke un kompania ta liber pa skohe kon e ta hasi su negoshi, e mester keda kòrda i tene na kuenta ku no ta aseptabel ku e konsumidó ku si ta kumpli ku su obligashon di paga pa un produkto òf servisio, no ta risibí e trato i kalidat di produkto ku e ta meresé i tin derechi riba dje.