Punda—Un kalkulashon riba nesesidat di likides ta sufisiente pa garantisá pago na penshonadonan di Ennia. Esei ta lokual un kalkulashon impliká ta indiká.

Na e momentonan aki Ennia ta den un nesesidat di un kapital sirkulante di 3.5 mion florin mensual pa kumpli ku su pagonan na penshonadonan. Esaki segun un proposishon di un komishon, instalá pa minister Javier Silvania.

Si bai tras di e kalkulonan, tin mester di 36 luna pa por warda e tratamentunan den Korte Sivil riba Ennia finalisá. Esaki ta enserá un Fondo Garantisa di 126 mion florin, ku por sirbi den forma sirkulante si akaso Ennia mester tin nesesidat di dje. Pues, e suma aki ta leu for di 700 mion menshoná den medionan di komunikashon. 700 mion ta solamente oumentá e debe nashonal innesesariamente.

Na e momentonan aki, Kòrsou su debe na Hulanda ta kasi 3.5 miar florin. Un oumento di 700 mion florin pa refinansiá Ennia ta trese e debe na 4.2 miar florin. Demas kréditornan (institutonan) di Gobièrnu ta entre 600 mil pa 800 mil florin, tresiendo e debe nashonal na kasi 5 miar florin. Esaki lo trese nos Kota di Debe na por lo mínimo 90% sino mas.  Konforme e Areglo Mutuo, pa por kontrolá e debenan di Kòrsou, servisionan di gobièrnu, tei kai direkto bou di supervishon di e Komishon di Supervishon Finansiero i lo midi nan prestashon abase di indikadónan. Esaki ta lokual por konkluí for di e sekshon aklaratorio. Pa lokual ta trata departamento di finansas públiko spesífikamente, ta duna indikashon ku e supervishon lo ta destiná te ku aña 2039, i no 2027 manera preskribí.  Debí na Covid, e Produkto Nashonal Brutu di e paisnan (Kòrsou) a risibí un sla duru i mester rekuperá. Segun IMF, e kota di debe na Kòrsou lo yega na 90% di e Produkto Nashonal Brutu. I no tin niun motibu pa duda den IMF. Ku un bolsa adishonal na fiansa di 700 mion, nos ta yega 90% òf mas. E Areglo Mutuo originalmente a menshoná pa 2027 trese esaki bek na70% na Kòrsou i pa 2039 e meta ta pa yega na 50%. Esaki ta laga spekulashon pa pensa ku Hulanda tin mira a largo plaso pa ehekushon. E Areglo Mutuo a trese kambio den e lei di Konsenso pa Supervishon Finansiero spesífikamente pa por drenta mas profundo den kòntròl riba gastunan di e servisionan di gobièrnu. 700 mion èkstra ta hasi e situashon ma kompliká.