Karibe: e kontrakt entre RdK i Global, por hasi Kòrsou un sentro pa distribushon di asfalt.

ISLA—E sosio  di Refineria di Kòrsou, Global Oil Management Group di Boca Raton, Estádos Unídos, ta dispuesto na eksportá krudo di Kòrsou pa islanan karibense. Esaki ta lo lokual konseheronan petrolero Greta Lichtenbaum i David Ribner, a splika e Ofisina di Kontrolaria Aktivonan Internashonal OFAC).

Ta e intenshon pa saka e asfalt of di Kòrsou, eksportá dirèkt pa Estádos Unídos pero tambe tin opshon pa duna sosten na islanan Karibense den mantenshon di nan kareteranan. Esei ta nifiká, segun Lichtenbaum i Ribner, Kòrsou por bira un sentro di distribushon di asfalt pa e region karibense tambe. E konseheronan a menshoná e posibilidat den un petishon ofisial di Global pa risibi un lisensia di importashon di krudo for di Venezuela. Esei a sosodé via di OFAC. Komo argumento pa por importá krudo for di Venezuela pa Refineria Isla, Global a splika OFAC riba e demanda agudo pa bon kalidat di asfalt pa Estádos Unídos, pero alabes tambe ta duna sosten na e region karibense, konforme e maneho di gobièrnu Estado Unidense.

Refineria di Kòrsou i CRU tin hopi espektativa riba e desaroyonan di Global na Korsou. Entrante 1 di sèptèmber 2023, aktual personal di CRU a risibí kontrakt definitivo di empleo añadí na un mehorashon di kondishonnan sekundario. Esaki ta lokual un presentashon di CRU na e proyekto  “Start up of Asphalt train” a informá. Segun un presentashon  di CRU (Start Up of Asphalt Train), Global a firma dos kontrakt. Unu ku Refineria di Kòrsou i tambe ku Curaçao Refinery Utilities, CRU. Den e kontrakt ku RdK, Global ta asumí tur responsabilidat di operashon i mantenshon pa 1. Unidatnan pa produsí asfalt. 2. Produkshon di utilidat. 3. Fasilidat pa importá propano i butano. 4.Operashon di  tres parke di tanki (krudo, asfalt i destiladonan petrolero).  5. Thermal Cracking (krákeo térmiko). Esaki ta pa eventual ekspanshon den futuro.  E kontrakt ta firmá pa sinku aña ku posibilidat di ekstenshon di binti aña. E kontrakt ta laga espasio habrí pa entrada di un operador nobo na isla.