Minister Pik Pisas ta informá ku ministerio di GMN i Selikor lo anunsiá plannan di limpiesa di lugánan kaminda sangura por brui.

Willemstad, — Minister Pik Pisas ta informá ku ministerio di GMN i Selikor lo anunsiá plannan di limpiesa di lugánan kaminda sangura por brui.

Promé minister i alabes minister di Salubridat, Medio Ambiente i Naturalesa sr Gilmar Pisas, ta duna kondolensia na famianan di sernan kerí di e 3 personanan ku a fayesé pa motibu di Dengue. Promé minister Pik Pisas ta informá ku ministerio di GMN i Selikor lo anunsiá plannan di limpiesa di lugánan kaminda sangura por brui.Pisas ta bisa ku e situashon ku nos ta aden awor aki i di presensia di Dengue ya tei pa hopi aña kaba na Kòrsou durante di periodonan di áwaseru. Pero awor aki no ta pa motibu di áwaseru e sanguranan aki tei, pero pa diferente motibu. Nos klima tropikal ta ideal pa e sangura aki brui i mester eliminá e lugánan di brui aki, Pisas ta splika.

Na Kòrsou instrumentonan di vigilansia epidemiologiko tabata indiká ku tabatin aktividat di e vírus di Dengue, pero e situashon tabata hopi trankil den delaster luna di 2023. Yaskara Halabi, epidemiologiko  ta bisa ku e situashon ku a bira alarmante, por tin di haber ku kambionan ambiental di fenómeno Niña ku Niño. E epidemiologiko  a duna di konosé ku kasonan a oumentá eksponesialmente di un forma alarmante, den e delaster dos lunanan na Karibe, Sur Amérika i Sentro Amérika.  E situashon ta alarmante paso e sangura ku ta transmití Dengue no ta solamente brui den awa limpi mas. E sangura aki ta adaptando. Boneiru a determiná ku e sangura ta buta webu den awanan sushi di entre otro berpùt.

Pues, e situashon alarmante no ta na tumando lugá na Kòrsou so. Kasonan a kuminsá oumentá di manera signifikativo den e promé siman di febrüari 2024. Pik Pisas ta informá ku ministerio di Salubridat, Medio Ambiente i Naturalesa a alerta ya pa algun luna kaba riba situashon di Dengue riba nos isla. Pisas ta bisa ku a saka komunikado 22 di ougùstùs 2023, 6 di novèmber 2023, i 31 di yanüari 2024 den kual ta menshoná ku kasonan di Dengue ta sigui oumentá. A pasa videonan tambe di 3 pa 17 febrüari intensivamente pa informá komunidat. Melissa Arias  hefe di Salubridat Públiko ta bisa ku nos no ta den un situashon di krísis pa loke ta trata Dengue pero si ke evitá ku kasonan ta oumentá.

Den e simannan ku ta sigui ministerio di GMN lo duna amplio informashon den un kampana intensivo di konsientisashon pa asina yuda pueblo den e guera kontra di e sangura. Tambe lo sigui monitoriá e situashon. Ta hasiendo máksimo esfuerso ku otro kolaboradó pa asina tene e situashon di Dengue bou di kòntròl.