Minister di Desaroyo Sosial, Labor i Bienestar (SOAW) Ruthmilda Larmonie-Cecilia.

WILLEMSTAD – Riba e pregunta dikon a skohe pa un “uitzendbureau” ku ofisina prinsipal na Inglatera i no aki na Kòrsou (JobFlex), minister di Desaroyo Sosial, Labor i Bienestar (SOAW) Ruthmilda Larmonie-Cecilia a splika Parlamento ku despues di a kompará e “fee”, esta loke ta kobra entre JobFlex i diferente otro “uitzendbureau”, JobFlex a resultá mas bentahoso pa kaha di gobièrnu. I manera indiká e kompania konserní tin ku paga impuesto i primanan na Kòrsou.

Na promé lugá Parlamento tabata ke sa dje Minister si e ta na altura ku JobFlex ta inskribí na Inglatera. E Minister den su karta di kontesta: “A tuma nota ku e kompania ta inskribí na Kámara di Komèrsio di Kòrsou, ku un cribnummer na Kòrsou, komo Foreign Legal Entity ku su ofisina madre ta inskribí na Inglatera.” Parlamento tabata ke sa tambe pa kuantu tempu e kontrakt ku JobFlex ta firmá. “Manera mi a informá Parlamento durante diferente reunion for di aña pasá i tambe e aña akí, entre otro durante reunionnan pa tratamentu di presupuesdo di aña 2023, a buska 40 hóben ku tabata inskribí i buskando trabou den e área sosial, pa yuda ku e retraso den entre otro petishon pa ònderstant di masoménos 1 aña ku tabatin. Mi tabata risibí hopi reklamo tokante e retraso akí i riba petishon di e Ministerio, a haña koperashon pa tuma e personanan pa yuda. E Minister a quote: ‘Reunion di Parlemento di dia 15 di desèmber 2022 ‘Fasilidatnan ku e minister ta pone disponibel pa poblashon’, ‘Servisio na kasna di bario’. Nos ta konsiente ku e aña akí e servisio na nos kasnan di bario no tabata optimal. E motibu prinsipal ta pasó diferente kolega a bai ku penshon i no por a remplasá nan mesora. Nos ta kontentu pa partisipaá ku koperashon di Minister di Finansa nos a logra pa tuma 40 persona den forma di proyekto pa por yuda ehersé e trabounan akí den e kasnan di bario.’ “Tambe nos a kuminsá ku un bali di informashon, kaminda tantu via telefòn komo físikamente e kliente por haña tur informashon. Ta bon pa sa tambe, ku nos a skohe e personanan akí, di kua gran mayoria ta hóben, for di nos database di personanan ku ta buska trabou.”