WILLEMSTAD – Mirando e situashon ku a konstatá relashoná ku e proyekto Vigilansia Públiko ku Kámara, Kontrolaria General a rekomendá Minister di Hustisia den su rapòrt, pa laga fase 3 tambe, esta evaluashon di e proyekto tuma lugá mas pronto posibel. Pareu ku e trayekto di legislashon ku a start na ougùstùs di aña pasá.

Di e manera ei lo por tuma un desishon fundamentá tokante marcha di e proyekto i kon lo sigui dun’é kontenido, tokante e prioridatnan ku lo pone i relashoná ku formulashon di un plan konkreto. E ministernan di Hustisia i di Tráfiko, Transporte i Planifikashon Urbano (VVRP) dia 10 di ougùstùs 2022 pa medio di un dekreto nashonal, a instalá un grupo di guia i di trabou yamá ‘Stuur- en Werkgroep wetgevingstraject(en) en implementatie bestuurlijke handhaving cameratoezicht’.

E grupo di guia ta integrá pa ámbos Minister, i nan tin entre otro e tarea di supervisá marcha di e trayekto. E grupo di trabou ta formá pa diferente representante di ámbos Ministerio, un representante di SOAB i un hurista legislativo. E grupo di trabou mester formulá un plan di aserkamentu pa e trayekto den un plaso di seis luna i raportá mensualmente i por eskrito na e grupo di guia tokante marcha di e trayekto. E grupo di guia ta reuní ku e grupo di trabou un biaha kada dos luna pa monitoriá e trayekto. Manera Kontraloria a konstatá, e dekreto nashonal ta indiká ku e grupo di trabou lo duna atenshon entre otro na e puntonan ku mester regla ainda den lei relashoná ku responsabilidat pa plachi di number. I e opshon pa apliká lei atministrativo ora ta trata di infrakshon di tráfikoe asina yamá lei Mulder.

Aktualmente un grupo di trabou di e diferente paisnan di Reino, ku partisipashon di Directie Wetgeving en Juridische Zaken (DWJZ), representando Kòrsou, ta formulando e lei di Reino ku mester bini pa protekshon di dato personal. Kontraloria a duna Minister di Hustisia 8 rekomendashon den e rapòrt tokante e investigashon hasí di e proyekto Vigilansia Públiko ku Kámara. E konklushon di Kontrolaria ta ku e ehekushon no a tuma lugá na tempu ni di forma efektivo.

Tampoko a regla un presupuesto di antemano. Pa kolmo a eksedé e presupuesto ku a pone disponibel pa e proyekto despues (ku 1.8 mion florin) i porlotantu no por kompletá e proyekto denter di e presupuesto reservá. Kontrolaria ta rekomendá entre otro na Minister di Hustisia ku mirando ku ta su responsabidat pa garantisá un nivel adekuá di protekshon di dato ora ta prosesá dato polisial, e palabrá eksplísitamente ku DWJZ p’e risibí informashon regularmente riba e progreso lográ den realisashon di e Lei di Reino pa protekshon di dato personal. Alabes e Minister mester (laga) averiguá te kon leu e kámara- i demas ekiponan kumprá por utilisá ainda. Tambe e mester traha un presupuesto realístiko di e gastunan tantu pa kaba e proyekto, komo pa e vigilansia ku kámara por ta sostenibel. Por ehèmpel, gastu struktural pa konekshon riba ret, i mantenshon i remplaso di ekipo na tempu.

Den e ‘beleidsplan’ di fondo di kriminalidat di yüli 2022 pa yanüari 2023, Ministerio di Hustisia a reservá 1 mion florin pa e proyekto. “E pregunta ta si esaki ta sufisiente, mirando loke mester realisá ainda.” Kontrolaria ta e preparashon no tabatin un dokumento ku tabata preskribí e eksigensianan tékniko di e kámaranan.” Steven Croes di PAR a mustra riba e fabrikante dje kámaranan Dahua, ku supuestamente ta riba e lista di National Defense Authorization ACT (NDAA), ku instansianan merikano ta prohibí di hasi negoshi kuné. El a puntra si Kontraloria a investigá si e fabrikante di e kámara ta riba e lista di NDAA. Pero segun ARC, den nan investigashon no a bin dilanti ku a kumpra kámara for di Dahua, pero ku a kumpra kámara serka Inspur. “Manera menshoná den e rapòrt, a sera dos kontrakt ku Inspur.”.