Kòntròl: Raymond Knops, probablemente no ta bin bèk pa maneho di islanan di Reino den Karibe.

Punda– E Lei di Konsenso nobo ku ta regla kontenido di Entidat di Karibe ta preskribí nada ku Kòrsou hasi, pafó di e Entidat di Karibe, no ta bai haña aprobashon di Hulanda. Tampoko si Kòrsou tuma akshon kontra di e Pakete di Pais.

E èkstra outoridat riba ministerio di finansas ta unu dje kondishonnan ku Kòrsou a aseptá a kambio pa sosten finansiero for di Hulanda. Si servisionan di gobièrnu, fundashonnan di gobièrnu òf kompanianan gubernamental no atené nan mes na instrukshon konforme e Lei di Konsenso Entidat di Karibe, Hulanda lo apliká èrmèntnan disponibel via di Statüt, esaki komo último èrmènt si Kòrsou no atené su mes na e Pakete di Pais i aplikashon di e Lei di Konsenso nobo.

Esaki ta lokual e lei di konsenso ta splika i ta referí na e pakete di kada pais ku Hulanda ainda mester fórmula konkretamente. Te na e momentunan aki e struktura nobo ta funshoná via di un Lei di Konsenso. E lei di Konsenso ta duna instrukshon pa Hulanda sera un pakete di medida pa kada pais separá. E paketenan separá tin relashon riba lokual Hulanda a bini ta instruí e paisnan pa desaroyo ekonómiko. Den kaso di Kòrsou, ta trata inkumplimentu di Kòrsou na e Akuerdo di Kresementu. Gobièrnu di Kòrsou, no a duna reakshon riba un atvertensha di ekspertonan ekonómiko na Ulanda: ehekutá Akuerdo di Kresementu. For di yüli 2019, Raymond Knops a manda su atvertensha mediante e akuerdo, pero ku bon intenshon. Gobièrnu di Kòrsou no a reakshoná riba kontenido di e akuerdo i awe Kòrsou tei paga e preis miéntras e intenshonnan di Knops entretantu no tin bon intenshon.

E minister di Finansas komo di Ekonomia lo sinta wak kon e fundashon independiente ku Ulanda lo instituí tei trata na skapa e ekonomia lokal miéntras via di DNB (Banko Sentral Ulandes) tei manehá instrumentonan monetario. Un punto importante den vishon di Hulanda ta e situashon na Ennia Caribe. Korte sivil na 2021 lo trata e kaso di Ennia Caribe. Un sakeo desproporshonal ku a kosta riba 1 miar florin ku a tuma lugá tantu bou di nanishi di maneho anterior na Banko Sentral pero tambe bou di e maneho interino na òktober 2017.

Entretantu ekspertonan lokal no por sali afó.  Ku 3.4 mil mion florin  na debe, un kantidat di fiansa riba bullet sin ta kumpli i menasa riba défisit di 600 mion florin, no por skapa Kòrsou sin aseptashon di intervenshon.  No por konkluí nada otro. Ulanda ta kombensé ku Kòrsou no por rekuperá su ekonomia, su finansas públiko i ni tampoko mantené su balansa monetario. Hulanda, den e Lei di Konsenso proponé a bisa bon kla si no tin rèspèt pa lokual tin riba mesa, lo apliká Statüt den forma ekstremo. E biaha aki konsientemente Kòrsou a aseptá e Lei nobo di Entidat di Karibe (COHO) i Pakete di Pais mará na dje.

Aparte di e Entidat di Karibe (COHO), kada pais mester sera un di dos akuerdo ku Hulanda den forma bilateral, esta Kòrsou ku Hulanda. E akuerdo individual di kada pais, ta tene portanan habrí pa Ulanda por sigui eksihí mas kondishon. Por ehèmpel den anotashon pa e Lei di Konsenso nobo tin spesífikamente deskribí ku Kòrsou mester desaroyá su terenonan i propiedatnan. Esaki den forma di aktivonan riba balansa di kompanianan anónimo pero tambe simplemente tereno riba e isla, esta e asina yama “grondontwikkeling”. Pa tal motibu e Lei di Konsenso ta duna akseso na Hulanda pa drenta den maneho di e kompanianan anónimo. Esaki por via di e Paketenan di Pais ku Aruba, Kòrsou i St. Maarten ta bai firma individualmente. Kòrsou a firma e promé parti kaba djaluna tras di lomba.