Otrobanda: bon notisia direkshon Otrobanda. Kura Hulanda ta haltu riba lista di invershonistanan albanes.

Otrobanda—Un grupo invershonista di Albania, kende luna pasá tabata sirkulá riba ret sosial na Kòrsou a resultá di ta un grupo serio. E grupo a hasi un bid di kompra riba Hotèl Kura Hulanda na Otrobanda i Kura Hulanda Lodge

E dos hotèlnan Kura Hulanda ta den problema finansiero i operashonal hopi serio i último añanan tabatin diferente bid riba mes pa benta. E bankonan Korpodeko i Maduro & Curiel’s Bank ta e konsorsio doño dje debenan i ta buskando operador òf mihó benta dje sentronan turístiko. Manera relatá ampliamente den Vigilante, e bolsa total di debe tabata 30 mion dòler estado unidense kual un parti  ta despresiá tresiendo e balor di benta alrededor di 17 mion dòler. Algun aña pasá un grupo kolombiano a ofresé esaki, pero e bankonan a ninga i hasi difísil. Ta sospechá ku e grupo albanes lo a hasi un bid di entre 11 pa 13 mion dòler pa kompra di ámbos hotèl, tantu na Westpunt komo na Otrobanda. Te ku ayera, ningun fuente ofishal no tabata kier a konfirmá ku pero for di kuater skina a keda konfirmá ku e bid ta riba mesa i bankonan ta deliberando. 

Kura Hulanda tabata den diskushon públiko tambe via di e fundashon SEO. Tabata e fundashon aki ku a manehá e finansiamentu di gobièrnu den e hotèl na 16 mion florin. Gobièrnu di Kòrsou, lo a pèrdè por lo ménos 16 mion florin, na momento Kura Hulanda Lodge wòrdu bendí, pasobra e sèn lo no regresá SEO mas kual fundashon a keda restituí. . Tur plaka ku gobièrnu a fia e hotèl via di su fundashon Stichting Economische Ontwikkeling, lo bai pa Korpodeko, kual huntu ku MCB ta forma e konsorsio di e fiansa na e momentunan aki.  E 16 mion florin tabata forma parti di un bolsa aktivá di 90 mion florin (sin kita provishon i balor nominal di fiansanan) ku a bai pa Korpodeko despues ku gobièrnu a laga destituí SEO.

Pero tin mas problema. Kurá Hulanda ta sigui den debe na Aqualectra. Nan no a logra kanselá nan debe i awor ta koriendo riesgo di medidanan legal kual e kompania nashonal di utilidat por bai imponé. E suma di 3 mion florin na debe serka Aqualectra ta motibu di prekupashon na momento di benta.  Último añanan e hotèl su operashon a bai asina atras ku riba Trip Advisor pa lokual ta trata Lodge na Playa Kalki, ta mal remarke so tin ku eksepshon di algun bon remarke. E turistanan ta bisa ku e lugá ta bunita pero e situashon di bankarota ta daña tur kos. Tin hasta rekomendashon pa NO keda den e hotèl.