Antes Punda tabata yen yen ku turistanan fo’i Venezuela. Pa e aña aki solamente 680 turista di Venezuela a bishitá nos isla.

Willemstad,– Utilisando datos disponibel por konkluí ku turismo for di Venezuela tabata generá por lo ménos 68 mion dòler na 2015.

Tur aña ofisina di turismo ta publiká sifras relashoná ku turismo. Sifra nan publiká ta entre otro, kuantu turista a bishitá na Kòrsou for di kua region i kuantu sèn nan ta gasta pa dia na Kòrsou. Pa ilustrá kuantu sèn turismo for di Venezuela tabata generá na Kòrsou, por nota ku 94.726 turista tabata pasa anochi na Kòrsou. For di e 94.726 turistanan, e turistanan tabata keda en total 581 mil anochi den 2015. Mirando ku na 2015 un turista fo’i Venezuela tabata invertí 118 dòler den ekonomia di Kòrsou.

For di e sifranan ariba menshoná por kalkulá ku turismo for di Venezuela tabata generá por lo ménos 68 mion dòler den 2015. Mester remarká tambe ku na 2015, tabata durante e krísis ekonómiko di Venezuela, pues por konkluí ku e krísis no a hunga un ròl masha grandi den turistanan ku tabata bishitá Kòrsou.

Apesar di e resultadonan positivo for di turismo di Venezuela. Hulanda a imponé ku reino Hulandes mester eksigí visa pa tur Venezolano ku ta drenta nos paisnan. Ta asina ku 200 visa por wòrdu otorgá pa luna na bishitante nan for di Venezuela.

Pa e aña aki solamente 690 turista for di Venezuela a bishitá nos isla. Esaki ta solamente 0.3% di e kantidat di turista ku a bishitá nos isla te ku mei 2023.