DEN HAAG—Algu mas ku un luna promé ku elekshonnan Tweede Kamer e guera entre Israel i Hamas ta hunga un ròl importante den kampaña.

Asina lider di D66 Rob Jetten a kuminsá su speech ayera ku e guera komo tambe su kolega lider di VVD Dilan Yesilgoz. Jetten a enfatisá den su diskurso e dos bandanan di e konflikto. E teror di Hamas kontra siudadanonan inosente na Israel a keda menshoná komo tambe e dos mion palestinonan ku no por bai niun kaminda den e prizon di aire liber ku tin na Gaza. D66 a papia di e nesesidat di un de-eskalashon na Israel i Gaza. Segun Jetten mester subi e preshon diplomatiko pa yega na un paro di e guera. A bira tempu pa investiga krimennan di guera, pa sese di fuego segun Jetten.

Yesilgöz tambe a menshoná e posishon aki pero menos fuerte. Loke ta importante pa nos, ta asistensia humanitario na Gaza. Ta trata di krea espasio pa aistensia. Esaki no ta kita e derecho di Israel pa defende su mes denter di derecho internashonal. E dos lidernan politiko, tambe minister, a djoin e posishon di gabinete manera ekspresa resientemente pa minister Ollongren. E minister di Defensa di D66 a bisa ku mester para e guera pa stòp un katastrofe humanitario den desaroyo na Gaza. Segun ekspertonan ta inevitabel ku partidonan pone atenshon na e guera den kampaña; e konflikto ta domina notisia i tin konsekuensianan pa Hulanda. Kon grand e ròl ta den kampaña finalmente ta depende kon e konflikto desaroyá. E kampaña ta dura un luna mas. Mas aleu partidonan sa ku votadonan ta basa nan voto prinsipalmente riba topikonan ku ta serka di nan: ekonomia, bibienda, transporte, energia, enseñansa. E dos lidernan no a papia solamente di Medio-Oriente. Pues kuantu e guera lo domina e kampaña ainda mester evalua. Yesilgoz a papia tambe di e apelashon di amtenarnan pa para Israel. Jetten a kritika su kolega di VVD bisando ku goberna ku un partner ku kontinuamente ta buska salida pa derecho ta stroba un gabinete stabil. Yesilgoz a indiká kaba ku no mester eskluí Wilders (PVV) di antemano komo partner di koalishon. Esaki a sosode bou di liderasgo di Rutte. Gabinete VVD, D66, CDA i ChristenUnie a kai den yüli riba migrashon.