Personal den kuido ta keda nesesario pa asina atendé ku nesesidat di kuido di grandinan den komunidat.

Willemstad, — Djabièrnè dia 10 di novèmber último, den reunion di komishon sentral di parlamento, a deliberá enkuanto di e poblashon di hende grandi aki na Kòrsou.

E kantidat di hende grandi ta subiendo i personanan yòn pa yuda ku kuido di grandinan ta bahando. Esaki ta palabranan di sr. de Lannoy, presidente di Raad van Ouderenbeleid. Esaki ta un trènt ku ta mira na Hulanda, Hapon i tambe na Merka. Segun de Lannoy, ta mirando mesun kos aki na Kòrsou ya komo nos tin un kantidat grandi di hende grandi kompará ku e personanan yòn ku tei pa kuida di nos hende grandi kual ta birando ménos.

E  presidente di Raad van Ouderenbeleid a kompartí ku den e promé senso di aña 1960 tabatin un 4.3 porshento di personanan ku tin un edat di 60 plùs. Den 2007 esaki a subi na 16%, den 2014 esaki a oumentá na 21.2%. Dos aña despues na 2016 e persentahe a oumentá na 22%, den 2019 na 24.2%, i CBS ta bisa ku den aña 2023, personanan 60 plus tabata 30 % di nos poblashon. Esaki ta un kantidat di 42.655 persona ku tin un edat 60 plùs den aña 2023, i sigun sifranan por mira ku e kantidat ta mas grandi kompará ku muchanan yòn den nos komunidat.

Pues por mira un oumento di e personanan 60 plus den nos poblashon durante añanan.