E hóben nan risibiendo splikashon tokante e trabounan den parlamento.

Willemstad, — Hóbennan di Fundashon Mangusá a hasi bishita na Parlamento pa asina haña un guia.

Djaweps último hóbennan di Fundashon Mangusá a haña guia di parlamento dor di parlamentario Sheldry Osepa i hurista Gioke Maduro. Aki tambe tabata tei presente señora Gerda Gosepa kual ta e fundadó di Fundashon Mangusá. Aktualmente Fundashon Mangusá ta brindando formashon riba diferente tereno pa desaroyo di hóben nan entre 13 pa 18 aña. Hóben nan ta bishitá e fundashon despues di skol den parti atardi, dos biaha pa siman pa asina por traha riba nan desaroyo.

Den kuadro di fakashon di òktober, e hóbennan di Fundashon Mangusá a hasi un bishita na Parlamento. E hobennan aki ta bini di diferente bario di Bandabou. Guiadó di proyekto na Fundashon Mangusá, Jahaira Muzo, a kompaña e hóbennan huntu ku Gerda Gosepa pa asina nan por eksperensiá i komprondé e sistema di Parlamento den kuadro di Trias Polítika. E guianan, parlamentario Sheldry Osepa i hurista Gioke Maduro, a splika e hobennan tokante kon e reunionnan ta tuma lugá den Parlamento. Tambe a splika e hóben nan tokante di e ròl di e parlamentarionan i ku esakinan tin un deber masha importante kual ta kontrolá e ministernan riba e direkshon ku e ministernan ke bai.

A involukrá e hóbennan por medio di un guia den Parlamento i a krea diálogo den kual a permití e hobennan hasi diferente pregunta. E guianan mes tambe a hasi pregunta na e hóbennan pa tèst lokual nan sa tokante di Parlamento. A hasi pregunta entre otro si e hóbennan sa kiko ta un moshon, e diferensha entre oposishon i koalishon, imunidat, Kontrolaria General, kòntròl i transparensia.

Tabatin algun hóben ku a hasi par di pregunta basta krítiko tokante di tópikonan aktual manera e lei di presupuesto i Refineria Isla. E hóbennan a hasi pregunta tokante di e kòntròl riba esaki i tambe e desishonnan ku a tuma relashoná ku Refineria Isla. E bishita na Parlamento ta un ehèmpel den kual e fundashon a eduká e hóbennan tokante di Parlamento i parti di e guia tabata pa asina duna e hóbennan e oportunidat pa hasi nan preguntanan na parlamentario Sheldry Osepa i hurista Gioke Maduro.

Sra Gerda Gosepa, e direktora di Fundashon Mangusa, a duna un danki na parlamentario Osepa i hurista Gioke Maduro pa e guia i splikashon. Gerda a hala atenshon den sala di reunion splikando di e importansia di e fundashonan ku ta traha ku hóben. Tambe a menshoná e importansia di supsidio pa asina fundashonnan por kubri proyektonan i gastunan.

Gerda a kontinuá i a duna un ehèmpel di formashon di un hóben ku tabata bini na Fundashon Mangusá for di temporada ku e tabata chikitu. Awor aki ku e hóben ta grandi, e ta lider den e fundashon i ta traha komo boluntario pa asina yuda ku formashon di otro hóbennan. Gerda a menshoná ku e ke sigui koperá ku e hóbennan pa asina tur e hóbennan por saka nan potensial.  Gerda Gosepa a duna un danki tambe na sra Jahaira Muzo kual ta guiadó di e proyektonan pa e hobennan ku ta forma parti di e fundashon. E guia na Parlamento a duna e hobennan un mihó perspektiva tokante di e trabou di parlamentarionan.