DEN HAAG—E termino pa turkonan i sirionan ku a bira víktima di temblor luna pasá, haña visa pa drenta Hulanda lo bira muchu mas kortiku.

Asina minister Hoekstra (Asuntunan Eksterior) a bisa den Tweede Kamer. El a reakshoná riba preguntanan kritiko di parlamentario Kuzu (Denk) i otronan riba e notisia ku abogadonan i miembronan di famia den Hulanda ta reklama ku poko hende a drenta Hulanda via e petishon aselerá. Ainda tin listanan largu di espera. Gabinete a anunsia despues di templornan na Turkia/ Siria ku viktimanan ku kier keda serka famia por pasa den un prosedura mas lihe pero e kriteria ta keda meskos. Hoeksta a splika ku 177 hende a haña visa kaba via e sistema, di kua 173 turko i 4 sirio. Esnan ku kier bai Hulanda mester wrda algun dia riba sita i ta haña yudansa denter di un siman, segun Hoekstra. Hulanda ta muchu mas lihe kompará ku otro paisnan segun e minister. E visa regular ta dura 6 pa 8 siman.