Back to Top
Responsive image
E korant di pueblo

20 aña di demanda pa kaso den "Hato Shooting"


January 29, 2021 • 3 minüt pa lesa

Esaki ta dia Basilia a yega Kòrsou despues di a keda detené na Hulanda i ayera a bolbe tende un demanda di 20 aña di prizòn den su kontra.

Willemstad,– Curtley Basilia, kual ta será for di Dezèmber 2018, ta será paso OM ta konsiderá Basilia komo e organisadó di e tiroteo kaminda 3 hende lo a bin pèrdè nan bida. Un di e víktimanan ku a bin pèrdè su bida ta e víktima Erwin Juliana alias  Djais kual tabata un di e kabesante di e gèng BVC. E otro dos víktimanan a fayesé debí na e balanan ku tabata skeiru rònt durante e tiroteo.

Durante tratamentu di e kaso korte di promé instansia e akusado Curtley Basilia alias “ true” a haña un kondena di 15 aña di prizon.   Ministerio Públiko a akusá  Basilia komo esun ku  lo mester a tuma kontakto ku un polis, Xavi De Windt, unda  e lo mester  paga Fl 50.000,-  pa haña e informashon unda e por a haña e hòmber Erwin Juliana alias Djais.   Debí ku De Windt tin bon konekshon den aeropuerto el a kuminsá traha riba esaki.

E hòmbernan lo a pèrdè nan bida apénas 5 meter leu for di otro.

Segun deklarashon nan di diferente testigunan e kabesantenan di NLS esta Tyson ku Nuto, mester tabata buska Djais pa “rekenaf” kuné paso grupo di Djais a hòrta droga di NLS den pasado. Den e mundu di gèng esaki ta inaseptabel pues asina un guera a kuminsá entre e dos gèngnan.

E polis De Windt a haña informashon ku riba 15 di Yüni 2014, Djais ku un otro persona lo bini for di Hulanda via di avion di Air Berlin. Xavi De Windt a risibí e informashon aki via di un persona ku ta traha na aeropuerto. E persona ku ta traha na aeropuerto na ningun momento no a kuestioná Xavi De Windt, paso Xavi ta un persona ku outoridat haltu den polis segun e trahadó di e tempu ei VDC. Segun Prokurador general  e persona ku tabata traha na aeropuerto no tabata sa ku e informashon aki lo a kosta bida di 3 hende apénas 45 minüt despues.

Diferente turista i hende lokal tambe a risibí bala riba e dia aki.

Basilia ta desmentí di tabata kómplise di asesinato debí ku na di promé e no sa komuniká ku De Windt i durante e suseso na Hato, e no tabata ni na Kòrsou. Basilia a yega Kòrsou algun dia despues di e susesonan segun su mes deklarashon.

Fiskal ta konvensí ku ta Basilia a organisá e asesinato debí ku na diferente momento De Windt por a deklará e posishon di Basilia. Ta asina ku De Windt a bisa ku el a papia ku Basilia durante Karnaval di St Maarten i De Windt tabata sa ki ora Baslilia lo tabata na Kòrsou. Basilia ta bisa ku De Windt tabata sa di esaki paso nan sa wak otro basta riba kaya si, pero no ku nan sa komuniká hopi ku otro.

Armanan di kaliber haltu a wòrdu usá durante e asesinato na Hato.

Despues di e suseso na Hato, Basilia lo mester a paga De Windt Fl 35.000,- den forma di 350 papel di Fl 100,-., kaminda e sobrá Fl 15.000,- De Windt lo a bai  risibí esaki despues. Algun dia despues ku De Windt a risibí e sèn el a bai kumpra un Scion Kòra pa Fl 11.000,- i el a paga esaki ku sèn kèsh.

Abogado Sulvaran mesora a splika ku no por kere e deklarashon nan di Xavi De Windt. Segun abogado Sulvaran, tin basta detaye ku Xavi ta kambia den su deklarashon nan. Asina el a bisa ku el a konta e sèn dilanti Basilia, pero despues el a kambia su deklarashon bisando ku el a risibí e sèn den un ènvelòp. Tambe Xavi a kambia e lugá ku nan lo a topa. Promé e tabata papia di palu blanku, pero despues e tabata papia di un rotònde kaminda tin un trùk di pan.

Abogado Sulvaran ta agregá den su defensa tambe ku ta imposibel ku un polis ta kambia e detayenan di su deklarashon i  un polis manera De Windt mes no sa e detayenan di su deklarashon. Úniko manera ku un polis no sa su detayenan ta na momentu ku e mes a pensa esaki. Tambe Sulvaran a bisa ku niun hende no por verifiká e deklarashon nan di Xavi De Windt.  Ayera prokurador general a hasi un demanda di 20 aña di prizòn pa e akusado basilia.

 Wes lo dikta  sentensia di Basilia riba 18 di febrüari 2020.

Login