N.N.V.Z a hiba un bon defensa den korte via di su abogadonan, pues e no mester keda será den e baraknan pendiente su deportashon.

Nieuwe Haven,– Djabièrnè último e hòmber ku inisial N.N.V.Z kende tin e status di indokumentá a gana su kaso den korte sivil. Mirando ku korte a duna e hòmber rason, e hòmber lo no mester keda den detenshon di ilegalnan na e baraknan na SDKK.

Ta trata di un hòmber indokumentá ku a sali for di Venezuela i drenta Kòrsou na yüli 2019. Algu ménos ku 4 aña despues, outoridatnan a detené e hòmber N.N.V.Z indikando ku el a kibra ku “Landsverordening toelating en uitzetting (Ltu)” pues e mester wòrdu deportá. Tambe outoridatnan a indiká ku e hòmber di Venezuela mester wòrdu deportá mas tardá riba 12 di aprel 2023.

Un dje rason nan dikon outoridatnan a detené i hòmber kaminda e mester a bai sinta su deportashon den barak tabata debí ku el a yega Kòrsou riba forma ilegal i mesora el a bai skonde pa ofisialnan gubernamental. Mas aleu, ministerio di hustisia a indiká ku e hòmber ta forma un peliger pa e órden públiko i alabes, N.N.V.Z lo rechasá su deportashon na tur momentu.

For di na momentu ku e hòmber Venezolano a keda detené i mester a keda den e baraknan, por a nota ku e hòmber tabata kontra di esaki. For di inisio N.N.V.Z tabata diskutí ku su detenshon tabata kontra di lei. Sinembargo a ser spliká den sala di korte ku si hues no ta di akuerdo ku e detenshon tabata kontra di lei, tin mas prueba ku ta indiká ku e detenshon di barak di ilegal no tin balides.

Artíkulo 19 di e LTU, a determiná ku un persona ilegal por keda detené solamente na momentu ku e por forma peliger pa e órden públiko. E detenshon tin e meta pa garantisá deportashon di e estranhero na momentu ku esaki sosodé. Mas aleu, por detené un indokumentado na momentu ku tin sufisiente prueba ku e persona lo rechasá su deportashon. Alabes, detenshon i deportashon ta tuma lugá basá riba motivashon ku mester wòrdu entregá na e persona mes.

Tambe tin diferente otro aspekto ku mester a tuma lugá promé ku detenshon di N.N.V.Z, pero pa un rason òf otro esakinan no a sosodé. Segun e veredikto, ministerio di hustisia no a ehekutá diferente aspekto, pues detenshon no tabata tin sufisiente base. E ministerio no a tende e situashon aktual di N.N.V.Z, e ministerio no a motivá dikon un un detenshon mas leve no ta adekuá, tampoko no a evaluá e situashon personal di N.N.V.Z.

Tur e echonan ariba menshoná riba un rei a konkluí segun e veredikto di korte sivil ku e detenshon den barak di N.N.V.Z no tabata tin un base legal. Tambe e “beschikking” indikando ku N.N.V.Z mester keda den barak pendiente su deportashon ta wòrdu anulá. Tambe korte a dikta ku N.N.V.Z por rekobrá su libertat mesora ku e veredikto wòrdu publiká.

Abogadonan mr Alicia Blonk i mr Joanne Jansen a hiba defensa pa N.N.V.Z i abogadonan mr Suares i mr La Croes a hiba defensa pa ministerio di hustisia.