Dilanti?: hopi diskushon tékniko di Gobièrnu di Kòrsou a bai dilanti òf patras kumprando Campo Alegre.

PUNDA—Den seno di bankeronan i eks bankeronan na Kòrsou, ta brotando opinionnan dividí riba e desishon di Gobièrnu di Kòrsou, pa laga Minister di Finansas Javier Silvania aprobá kompra di Campo Alegre, riba un destaho públiko. Campo Alegre/Wilshire, tabata debe Gobièrnu 25 mion florin fiktisio mediante un veredikto di korte for di 2008.

Vigilante a hiba e pregunta na diferente bankero si e desishon di Pik Pisas pa kumpra e lokalidat tabata un bon desishon. E kontesta te ainda no ta definí pero e diskushonnan tabata bastante tékniko. E pregunta tabata ta dikon Gobièrnu ta bai paga 8 mion florin pa kanselá un debe na su mes instituto ku tabata deb’é 25 mion florin. Pa por a logra kontesta e pregunta, sea korekto òf inkorekto, tabata diferente faktor i fariabel ku ta hunga un ròl. Na promé lugá, Gobièrnu a kumpra un aktivo pa 8 mion florin. Na di dos lugá Gobièrnu a kumpra un aktivo pa trata na kobra un retraso di 25 mion florin, pero pagando 8 mion florin. Kiko e debe a bira, 17 mion florin, 25 mion florin òf 33 mion florin.

Un direkshon di pensamentu ta ku konkretamente e debe di 25 mion a depresiá, esta e no tin un balor aktivá mas. Esei ta nifiká ku mester a tuma un apropiashon atministrativo unda e 25 mion teorétikamente a sirbi komo pèrdida, pero despues di 17 aña tòg ta risibi un kompensashon (aktivo) na 8 mion florin. Riba e pensamentu aki, Gobièrnu a bai dilanti ku 8 mion florin, pasobra e la risibi 8 mion florin plùs un aktivo balorá na 14 mion florin. 

Un direkshon kontrali di pensamentu ta ku aparte di a pone 8 mion florin, Gobièrnu tabatin un pèrdida kaba di 25 mion florin. Momento a kumpra Campo Alegre, Gobièrnu no tabatin un disposishon finansiero den forma di un bolsa di riesgo pa finansiá e kompra, nifikando ku pa Gobièrnu por rekobrá bèk, lokual a invertí, Campo Alegre mester produsí por lo ménos 33 mion florin. Pues e pensamentu aki ta konkluí ku Gobièrnu ta atras, 25 mion florin mas 8 mion florin ta 33 mion florin.

E di tres argumento ta bisa ku Gobièrnu tabatin un debedor (Campo) na 25 mion florin, el a paga 8 mion florin pa kumpra e lokalidat propiedat di e debedor pero a n’e mesun momento a atkerí 8 mion na aktivo. E sòm ta bira, 25+8-8= 25 mion. Esta gobièrnu a keda mesun leu.

Esei ta básikamente e tres argumentashonnan, spliká na un manera mas fásil i simpel posibel.