WILLEMSTAD – Korte den Promé Instansia ku ta trata kasonan Lei di derecho atministrativo (Landsverordening materieel ambtenarenrecht, Lar) a dikta sentensia ayera riba e apelashon di tres abitante di Pen Resort na Penstraat, kontra Minister di Tráfiko, Transporte i Planifikashon Urbano (VVRP) Charles Cooper i e terser partido interesá Pen Resort BV.

Korte a anulá e pèrmit di konstrukshon ku e Minister a duna e kompania, i disidí ku e mester tuma un desishon nobo denter di 4 luna, teniendo kuenta ku interes di ámbos partido.

Den e sentensia akí, Korte a evaluá e apelashon di e abitantenan Chantalle Grouwels, Vincent Levering i Saska Lans kontra e pèrmit di konstrukshon kambiá ku a duna Pen Resort dia 11 di yüli 2022. E kompania a risibí e pèrmit dia 13 di yüli 2022, pa desaroyo di un kompleho di hotel na Penstraat. E abitantenan a apelá e desishon akí dia 12 di òktober 2022. Korte a trata e apelashon dia 23 di ougùstùs último. E abitantenan a dirigí nan apelashon kontra e Minister di Salubridat, Medio Ambiente i Naturalesa i kontra e Minister di Desaroyo Ekonómiko tambe. Durante e tratamentu, nan a konfirmá ku e prosedura akí ta enfoká solamente riba e pèrmit di konstrukshon, pues, riba e Minister di VVRP.

Faktornan relevante

Pen Resort ta pretendé di realisá un kompleho di hotèl nobo ku ta konsistí di 300 kamber, 6 restorant, un spa, un salón di baile (ballroom), un playa, un pisina, un pir i un konstrukshon di kibra ola den laman (golfbrekers) riba un tereno di masoménos 21 hektar. E proyekto ta lokalisá na Penstraat i ta pegá ku Pietermaai. E abitante Grouwels ta doño di e tereno na Penstraat 30, ku ta kore den e área kompleto dje proyekto i ta dirèkt pegá na esaki. E abitantenan Lans i Levering ta doño di e tereno na Penstraat 29. E entrada dje tereno ta na banda kontrali dje entrada di tereno kaminda e monumento Kas di Pueblo ta lokalisá. E tereno akí ta forma parti dje proyekto.

Promé ku a duna un pèrmit di konstrukshon p’e proyekto, a duna Pen Resort un pèrmit di konstrukshon pa un kasino na 2008. Na mart 2016 nan a pidi un kambio di esaki i na mei 2017 a risibí e pèrmit di konstrukshon kambiá. I riba 22 di desèmber 2021, Pen Resort a pidi kambio dje pèrmit di konstrukshon duná na 2017. I ta e petishon akí a resultá den e desishon impugná. E proyekto ta dirigí riba un tereno ku tin dos diferente destino. E parti mas grandi dje tereno tin e destinashon di ‘Stedelijk Woongebied’. E punto mas altu dje proyekto ta e hal sentral ku ta pintá riba e plan di konstrukshon, na un altura di 20 meter. E parti dje tereno ku ta pegá ku Pietermaai tin e destiashon di ‘Binnenstad’. P’e destinashon akí, e punto mas altu segun e plan di konstrukshon ta 16 meter.

Riba e tereno tin dos monumento ku ta forma parti dje proyekto: Cerro Bonito i Kas di Pueblo. E monumento Kas di Pueblo ta lokalisá na e parti di e tereno ku destinashon ‘Stedelijke Woongebied’. E monumento Cerro Bonito ta lokalisá na e parti di e tereno ku destinashon ‘Binnenstad’. Pen Resort tin pèrmitnan di monumento pa ámbos. Cerro Bonito lo bira un restorant i Kas di Pueblo lo bira un ‘salon di baile’.

Evaluashon di Korte

Durante tratamentu e abitantenan a entregá motibunan nobo pa nan apelashon. E promé motibu ta ku Pen Restort no ta doño di e monumento Kas di Pueblo. E di dos motibu ta relashoná ku e akuerdo di maneho será entre Pen Resort i gobièrnu pa uso di tereno riba e kosta. Segun e abitantenan, basá riba e aresto Didam mester konkluí ku no por a sera e akuerdo di maneho ei mes. Pero dor di warda pa entregá e motibunan nobo te na tratamentu dje kaso, e Minister di VVRP i Pen Resort no a haña oportunidat pa reakshoná di forma adekuá riba nan. P’esei Korte a disidí di no konsiderá e motibunan i a base di un bon órden di proseso a pone nan un banda, sin trata nan mes.

Konklushon

Pero sí Korte yega na e konklushon ku e apelashon dje abitantenan ta fundá. E desishon impugná no ta sufisientemente motivá. A anulá esaki. No por saka afó ki interes Pen Resort tin segun e Minister di VVRP, pa desviá for di e altura máksimo di konstrukshon di 8 meter, ni tampoko kua interes dje abitantenan a tuma na kuenta ora di evaluá e posibel molèster ku por surgi komo konsekuensia di e desviashon dje altura máksimo di konstrukshon. E Minister no a duna klaridat riba esaki ni den e komentario di defensa ni durante e tratamentu tampoko. Porlotantu e konsekuensianan legal di e desishon impugná no por keda na vigor, pasó ta na e Minister pa determiná i evaluá e interesnan.

Esaki ta nifiká ku e Minister mester tuma un desishon nobo riba e petishon di Pen Resort di dia 22 di desèmber 2021, teniendo kuenta e sentensia akí. E Minister mester determiná e interes ku tantu Pen Resort komo e abitantenan tin. Ademas e mester motivá kuantu importansia mester duna na e diferente interesnan akí i pisa e interesnan kontra otro. E mester tuma un desishon nobo denter di 4 luna. Komo e partido pèrdèdó, gobièrnu mester paga gastunan di e proseso akí.