Ayera Vilchez a haña di tende ku lo laga mata su dos kachónan ku ta un molèster pa e bario i tambe e habitantenan.

Willemstad—- Korte a trata un kaso kontra di e hòmber Amadeo Vilchez (1964) kual ta wòrdu akusá ku dos di su kachónan mester a morde dos persona i tambe di a morde un otro kachó mata durante e lunanan  mei,  òktober i novèmber aña 2022.

E akusado Vilchez tabatin tres akusashon den su kontra pero ayera no por tabata presente den korte ya ku e tabata den eksterior pero tòg a sigui su kaso via di video conference. Vilchez ta wòrdu akusá ku dos di su kachónan    den luna di mei na aña 2022 mester a subi tereno di su bisiña i ataka i  morde un  kachó di tal manera  ku e konsekuensha ku e la bin fayesé. Tambe e ta wòrdu akusá ku dia 14 di novèmber 2022 e mesun kachónan di e nomber Chloe ku Yuli mester a ataka e víktima da Costa Gomez i a morde na su pia drechi parti abou.  E mesun kachónan aki 20 òktober 2022 mester a sali fo’i kura un biaha mas i a morde un peaton na su pia. Debí na e kehonan aki Ministerio Públiko a laga konfiská e dos kachónan i a pone nan na Dieren Asiel wardando tratamentu di e kaso aki.  Via Video Conference Vilchez a splika ku enbèrdat e no ta na kas tur dia pero a ser pone na altura ku su kachónan sa sali for di kura via di e waya ku ta repartí e tereno di dje ku su bisiña. Pa ku esaki e la hasi tur esfuerso tratando na sera e vianan pa e kachónan no sali. Asta e la aserka e bisiña pa huntu nan lanta un muraya di blòki pero e bisiña no a hasi kaso di esaki. Vilchez a splik’é ku den luna di òktober enbèrdat e la wòrdu yama unda a bisé ku su kachónan a morde un peaton djis despues ku e la sali su kas i a sera su porta di kura. Ora e la yega e la bin topa e porta di kura saka for di rail. E la aserka e víktima i a mira algun raspu na su pia i a splika e víktima  pa bai su dòkter di kas i e lo kubri e gastu nan kual e la hasi. Riba e kachó di su bisiña ku a muri, Vilchez a splika ku e no por bisa masha pero si e tambe por bisa ku su kachónan tambe sa tin herida di morde. Pa e morde ku su bisiña a sufri e no por bisa tampoko masha ya ku e no tabata na kas dia esaki a sosodé. E bisiña kual ta e víktima tabata presente den Korte a splika ku ta kasi tur dia e kachónan di Vilchez ta den su kura. Ta trata di kachónan basta deskuidá i hopi flaku kual ta drenta den su kura buskando kos pa kome. Na vários okashon e la splika Vilchez di e situashon pero nada no ta ser hasi. E kachónan tin kasi henter e bario molestiá i por mira esaki na reklamo ku sobra habitantenan tambe a hasi.  E dama bisiña a bisa ku e la sufri un morde di e kachónan di Vilchez i esaki nunka no a hasi kaso ni puntra kon a bai. Tur dia e tin ku keda sera den su kas ku e temor pa e kachónan di su bisiña ku ta ataka tur hende i tambe bestia.  E dama víktima  a pidi un daño perhuisio di 430 florin debí ku dia su kachó a ser mata e mester a bai dòkter ku esaki i tambe a pèrdè 1 dia di trabou. Fiskal a haña ku e kachónan a bira un molèster pa henter e bario i ku ta manera Vilchez no kier buska un solushon pa esaki. Fiskal a hasi un demanda di un but di 1500 florin di kual 500 florin kondishonal ku un periodo di prueba di 3 aña. Tambe Fiskal a pidi pa laga pone e kachónan drumi. Hues a dikta sentensia mesora i a haña tur e tres akusashonnan proba ya ku tin grabashon i tambe potrèt di tur loke e kachónan a kometé. Hues a bai di akuerdo ku e demanda di Fiskal unda ta laga mata e kachónan i tambe Vilchez mester kubri e daño perhuisio i tambe e kondena di Fiskal ku ta 1500 florin di but di kual 500 kondishonal.