Si no ta Dierenbescherming ken ta para responsabel pa e kachónan riba kaya e ora ei? Giselle Mc William ta puntra.

Willemstad, –Parlamentario Giselle Mc William di frakshon MAN ta menshoná ku e úniko opshon pa atendé ku situashon di 4000 kachónan riba kaya ta pa pone esnan ku no por biba un bida digno mas drumi.

Giselle Mc William di frakshon MAN a menshoná ku niun di nos no ke pa mata kachó pero mester ta sinsero ku 4000 kachó riba kaya. Ku ningun sanktuario, ni maske traha mas sanktuario, e no ta bai ta sufisiente pa por atendé ku e kachónan riba kaya di un manera digno. Hopi di e kachónan aki tin malesanan i pues mester pone esnan ku no por biba un bida digno mas drumi, Giselle ta menshoná. Giselle ta bisa ku ta ku doló den kurason ta bisa esaki, paso e a duna di konosé ku e tambe stima bestia.

Pero segun e parlamentario stimamentu di bestia no ta duna kachó kuminda tur dia na pia di brùg òf na kualke krusada pero e kachó mester haña amor i dedikashon tambe. Giselle ta menshoná Stanley Ignacio komo un persona ku ta stima bestia den e pais aki i ku ta papia hopi di abuzu di animal. Si nos mes hendenan ta bisa ku e úniko manera pa trata ku problema di kachónan riba kaya ku ta forma molèster i tambe no ta biba un bida digno, mester pone nan drumi.

Giselle Mc William ta puntra ken por tin un palabra mas haltu manera un persona manera Stanley Ignacio i pues e ta reta gobièrnu pa atendé ku e problema di kachó riba kaya manera mester ta. Mester atendé kue e lei di bienestar di animal paso e lei a wòrdu aprobá den parlamento i e lei a wòrdu publiká dor di gobièrnu. Pues gobièrnu tin responsabilidat ku e lei aki. Ademas, si Dierenbeschemring tin kos ku mester atendé kuné mester sinta na mesa pa solushoná esaki, e parlamentario ta komentá.

No por ta asina ku ta saka miónes pa Campo Alegre, miónes pa consultants, miónes pa biaha mundu i no por atendé ku NAf. 300.000 pa bienestar di animal. Den pasado CTB a laga hasi un investigashon bou di turistanan kual a indiká ku e dos kehonan ku mas a bin dilanti bou di turistanan, ta e kantidat di shushi ku tin riba nos isla i ta kantidat di bestia kual entre nan mayoria ta kachó ku ta kana lòs riba nos kaya “sin pariba sin pabou”. E resultadonan aki a pone ku CTB a drenta un kombenio ku Dierenbescherming pa asina buska moda di solushoná e problemátika aki na Kòrsou.

Den esaki CTB lo a yuda pa asina famianan por adoptá kachónan ku ta kana riba kaya. Pero, lamentablemente pa falta di kapasidat i rekursonan, e kachónan no por a keda pa semper na e asil i pues ábase di lei stupilá pa gobièrnu, e kachónan ku no keda adoptá, mester a pone nan drumi. Presidente di Dierenbescherming, Maria Luisa Garcia a duna di konosé ku fondonan di CTB a bai pa sterelisá kachónan riba kaya.