WILLEMSTAD — Presidente di Korte Komun di Hustisia hues Mauritsz de Kort resientemente a informá gobernador, Parlamento i gobièrnu ku entrante 1 di òktober último a nombra hues William Winfield ku forsa retroaktivo, komo presidente di e komishon di supervishon di nos servisio di inteligensia, esta Veiligheidsdienst Curaçao (VDC).

Hues J. Sap tabata presidente for di 1 di febrüari 2018 te ku su retiro na 1 di yanüari 2020. Hues Arno van Suilen a sigui den e puesto di presidente for di 1 di yanüari 2020 te ku si retiro entrante 1 di aprel di aña pasá. Ni hues Sap ni hues Van Suilen ta miembro mas di Korte Komun di Hustisia i no ta traha einan mas. Porlotantu mester a tuma e desishon tokante presidensia dje komishon. I teniendo kuenta ku artíkulo 22 dje Landsverordening Veiligheidsdienst Curaçao a duna hues Sap retiro honorabel entrante 1 di yanüari 2020 i hues Van Suilen entrante 1 di aprel 2021, gradisiendo ámbos pa nan trabounan desplegá. Alabes a nombra hues Winfield e luna akí komo e presidente nobo, ku forsa retroaktivo entrante 1 di òktober 2022.