WILLEMSTAD – Mester di aprobashon di henter Reino Hulandes pa un konsepto di Lei di Reino pa aprobashon dje Tratado di 1996 i e Protokòl di 2010 tokante responsabilidat i kompensashon di daño perhuisio di dañonan relashoná ku transporte marítimo di sustansianan peligroso i dañino.

E tratado ta konosí den sírkulonan marítimo internashonal komo tratado ‘HNS’. E gobièrnunan di Aruba, Kòrsou i Sint Maarten ainda ta konsiderando pa forma parti dje konvenio akí. Ya ku Kòrsou tin su propio registro, Kòrsou lo implementá e legislashon di implementashon nesesario pa via di un proseso legislativo separá.

E tratado ta regla e responsabilidat i kompensashon di dañonan di perhuisio den kaso di aksidentenan ku ta embolbí barkunan di transporte di sustansianan peligroso òf dañino komo karga via laman. Tipo di aksidentenan asina por provoká un gran kantidat di leshonnan grave òf asta morto, inkluyendo pafó skòp. Ademas ta eksistí un rísiko altu di dañonan ekonómiko grave pa e transporte marítimo, e poblashon, otro empresanan i gobièrnunan, i tambe dañonan grave pa medio ambiente.

A base dje tratado, e doño di barku ta responsabel pa dañonan kousá pa e sustansianan HNS. E por limitá su responsabilidat a base dje konvenio na un límite máksimo. E tratado tin su propio régimen di limitashon. E límitenan spesial di responsabilidat a base dje tratado, ta muchu mas altu ku e límitenan general di responsabilidat pa reklamonan marítimo den e Tratrado di Limitashonnan di London (LLMC). Esaki ta ofresé víktimanan di aksidentenan ku sustansianan HNS un protekshon adishonal. Komo resultado di esaki nan por risibí un kompensashon mas altu.

Ademas e tratado ta obligá e doño di barku sigurá su mes pa sumanan di su responsabilidat limitá. Finalmente e tratamentu ta proveé e establesimentu di un fondo di kompensashon internashonal (fondo HNS). Ta yena e fondo akí ku kontribushonnan finansiero dje desisnatarionan (empresanan) di sustansianan HNS. E víktimanan por risibí kompensashon adishonal dje sustansianan akí. Esaki ta e kaso por ehèmpel si e seguro obligatorio dje doño di barku no kubri tur daño. E konsepto di Lei di Reino lo regla tur esaki.