Kenneth de Fares ku a wòrdu haña morto den kamber di e hotèl na Medellin.

Colombia–  Outoridatnan ta kondusiendo un investigashon na unda a bin topa ku un kurpa sin bida di un hòmber ulandes den un kamber di hotèl.

Tabata djabièrnè último ku bin deskubrí kadaver di un hòmber di nashonalidat ulandes sin bida den kamber di un hotèl  den e bario El Poblado na Medellin.  Tambe tin ku bisa ku durante di e último dianan ku a pasa no ménos  ku kuater turista a bin fayesé bou di sirkunstansianan basta straño den e mesun siudat. Tabata djabièrnè den oranan di atardi ku outoridatnan mester a bai den e  sektor di Lalinde pa asina hasi investigashon riba un kurpa sin bida. despues di a haña un yamada for di un telefon ku tin un hòmber sin ta duna señal den kamber di e hotèl a bai na e sitio pa asina por a hasi mas investigashon. 

  Un trahadó di e hotèl ku a bai den e kamber pa hasi su trabou a bin tuma nota ku e guest tabata drumi boka ariba riba e kama. E trahadó a trata di komuniká ku e guest na diferente okashon i na momento ku e la ripara ku e guest no tabata reakshoná e la pone gerente di hotèl na altura di loke ku tabata pasando kual mesora a yama polis. Ta trata di e ulandes Kennteh Jules de Fares di 57 aña di edat.  Despues di a alarma outoridatnan personal di ambulans a yega na e hotèl i a bin topa ku  e kurpa sin bida drumi pero ya no por a hasi nada mas pa e víktima. For di e promé investigashon por a dedusí ku e hòmber aki tabatin relashon ku dos dama den kamber di e hotèl. Na kurpa di e hòmber no a bin topa ku señal di violensia.  Mesora a kuminsá ku un investigashon pa asina determiná e kousa di e morto.  E instituto nashonal di medisina legal i siensia Forensiko mesora a kuminsá ku nan investigashon pa asina determiná kiko por a okashoná e morto di e hòmber ulandes na Colombia.  For di fuentenan por a komprondé ku sigur e víktima aki a pasa su último oranan den kompania di dos dama kual a logra di drenta den kamber di hotèl ku ta algu ku no ta wòrdu permití.  Investigashon den e kaso aki ta kontinuá pa trata di saka afó kiko a kousa e morto di e hòmber ulandes.