WILLEMSTAD,– Relashoná ku awaseru di último tempu ta importante pa informá e derechi ku hürdónan tin na momentu ku tin problema na e kas ku nan ta hür.

Ayera Vigilante a risibí diferente informashon i reklamo indikando ku nan kas tabata bou di awa durante e tormenta inesperá ku a tuma lugá den oranan di mardugá bai kue mainta. A risibí entre otro notifikashon ku dak ta lèk i otro notifikashon kaminda henter kas tabata bou di awa.

Segun nos leinan, na momentu ku konstatá algun imperfekto na un kas, tur hürdó tin derechi pa pidi e doño di kas pa drech’é. Abogado mr Conquet kende ta eksperto den leinan sivil a indiká entre otro ku un hürdó mester duna e doño di kas sufisiente tempu pa drecha un imperfekto na e kas.

Si akaso konstatá ku e dak ta lèk, e hürdó mester duna e doño dje kas un término rasonabel pa drecha e problema. Segun abogado Conquet, 5 dia pa drecha algu riba un dak ta sufisiente tempu. Mas aleu e abogado a remarká ku tur kos mester sosodé por eskrito. Sea ta manda un karta, manda un mail òf djis manda un Whatsapp, tur ta sufisiente pa determiná ku e informashon a ser duná por eskrito.

Akaso despues di e tempu rasonabel ainda e doño no a drecha e problema na e kas, e hürdó mes por drecha e problema i deskontá e gastu di drechamentu for di e hür.

Tambe mester splika ku nos leinan lokal ta dikta ku e habitante ku kas riba tereno mas haltu, tin derechi pa bora buraku den su muraya pa e awa move i sigui bai na e bisiña ku ta biba riba e tereno mas abou.  Vigilante a tuma kontakto ku abogado mr Conquet kende a splika ku esaki ta bèrdat i  segun nos leinan sivil tereno nan mas abou mester risibí awa ku kai for di terenonan situá mas haltu.