Bishita: Hushang Ansary un biaha mas na Kòrsou pa tratamentu kaso Ennia Caribe Holding

Nieuwe Haven—Hushang Ansary, presidente direktor di Parman Group, a yega Kòrsou durante wikènt. Ansary ta pendiente un desishon den korte di apelashon pa djamars próksimo.

Esaki ta di kuater biaha, Ansary ta bini Kòrsou pa tratamentu di su kaso. Ansary, mediante su abogado Mirto Murray yega di manda un karta pa Banko Sentral, dirigí na direktor Jose Jardim i Elisabeth Grimm, mènedjer Sekshon di Resolushon. Den e karta, Murray ta proponé pa yega na un final den e debakel di Ennia i trata na evitá prosedimentunan den korte sivil. Den e karta di Murray, a proponé un pago konforme e último desishon den korte sivil, pa lokual ta trata e pagonan totalisa na 1.1 miar florin. Ta trata di kasi 560 mion dòler estado unidense. Murray a skibi su proposishon na nòmber di PIBV, Parman International BV i ta representá tur akusadonan den e proseso sivil.

Pero e proposishon di PIBV a bini miéntras tabata preparando tratamentu den Korte di Apelashon, despues ku grupo Ansary a apelá e veredikto riba 29 di novèmber 2021 di wes Notenboom. Den e veredikto, e wes a duna wisio pa tur akusadonan en kombinashon i solitario paga 1.1 miar florin bek despues di un sakeo i transformashon di aktivo for di Ennia Caribe Holding. Aparte di e veredikto den Promé Instansha i un posibel desishon den Apelashon mañan, tin andando un apelashon di Hushang Ansary riba un desishon den wisio sumario pa kòntròl di e kompania EC Investments. E kompania tin bou di su maneho algun invershon i tambe bienes inmóbil, manera Mullet Bay Beach Resort.

Hushang Ansary i abogado Richard Gibson a yega di akusá  direktor di Banko Sentral di Kòrsou i St. Maarten (CBCS), José Jardim, di a aktua di mala fe i nan a presentá akusashonnan krítiko kontra di dje den e problema di Ennia, ku ta andando. Den un dokumentu, filtrá dor di un fuente konfiabel i bon informá, Gibson i Ansary a manda un karta pa Jardim komo kontesta riba esaki su petishon pa un reunion di zoom riba16 sèptèmber pa posiblemente resolvé e problema di Ennia. Segun e karta si e intenshon ta pa yega na un resolushon serio,  Gibson i Ansary ta bisa di ta interesá. Sin embargo, ta  difísil pa nan komprondé e berdadero motibu pa e reunionnan priva i e yamadanan di zum na mes momentu ku ta tuma medida kontra sierto akshonista estadounidense i sierto miembro di atministrashon relashoná ku gastunan legítimo di 11 aña pasa, kaminda tin benefisio ekstraordinario di propiedat priva di e entidat di e mesun akshonistanan merikano. E no tin nada di haber ku un akuerdo entre e entidat aki i Ennia Leven ku a hasi tur su  posibel pa Ennia Leven por a kumpli ku su obligashonnan pa ku su aseguradonan di un manera oportuno na tur momentu ”. Esaki segun Ansary i Gibson.  Ademas, Ansary i Gibson a rekordá Jardim ku ketu bai é ta sigui ripití públikamente e mesun akusashon falsu, alegando ku e akshonistanan merikano di Ennia a pone un total di 400 mion dòler di e kompania riba nan mes kuenta di banko. “Nos a ninga esaki kategorisamentu den e reunion di 1 febrüari 2020 na Florida dilanti di Jardim i nos a agregá ku pa e  kantidat di plaka ei keda transferí for di e kuentanan di banko di Ennia mester di instrukshon di dos Direktor General di Ennia, ku outoridat pa firma ”, esaki ta pará den e karta pa Jardim.

No ta promé biaha ku e grupo ta proponé un areglo pafó di korte. Durante e tratamentu prinsipal na Òktober 2021, Banko Sentral mediante deklarashon di Jose Jardim a splika wes ku na vários okashon e grupo tabata duna ofertanan pero despues ta resultá ku e intenshon no tabata serio. Hushang Ansary, durante su turno a splika wes ku Jose Jardim a bula bai te Miami pa sinta na mesa, pero tampoko no tabata serio den su intenshon. E deklarashon di Ansary, no a keda aklará despues den korte.  Na 2018, tambe e partidonan a konfrontá otro despues ku korte a duna outorisashon pa imponé un medida di emergensha.  Durante e tratamentunan di 2018 tambe CBCS a bisa ku Ansary a hasi diferente proposishon pa yega na un areglo.