Minister di Desaroyo Ekonómiko, sr. Ruisandro Cijntje.

Willemstad- Komo minister enkargá ku e sektor di turismo, Minister di Desaroyo Ekonómiko, sr. Ruisandro Cijntje, a tuma nota ku asombro di un proseso tumando lugá pa implementá un fondo di Naturalesa i Medio ambiente na Kòrsou riba nos turistanan di estadia i turistanan krusero.

Lo ta e intenshon pa entre otro kuminsá kobra e turistanan pa por tuma parti na aktividatnan di deporte akuátiko na nos playanan, lamannan i awanan teritorial. Tambe ta e intenshon pa kobra kompanianan ku ta duna e servisionan aki un montante di $1500 ekivalente na 2700 florin pa aña i alabes e kompania en kuestion lo mester ehersé e kontrol. E proposishon aktual, segun minister Cijntje a komprondé pa medio di un artíkulo den korant, ta pa kobra turistanan di estadia un montante di $55 ekivalente na 100 florin pa aña i e turistanan krusero ku ta keda ménos ku 24 ora na Kòrsou un montante di $10 pa aña. Muchanan bou di 13 aña di edat i siudadanonan di Kòrsou, Aruba, Boneiru, Sint Maarten, Saba i St.Eustatius ta keda ekskluí. 

Minister Cijntje ta lamentá ku e intenshon pa introdusí un impuesto similar ku ta bai tin efekto riba un sektor asina prominente den nos ekonomia, no a keda deliberá ku profeshonalnan den e sektor di turismo promé. Ministerio di Desaroyo Ekonómiko (MEO) i stakeholdernan importante manera Curaçao Tourist Board (CTB ) no a wòrdu konsultá kaminda nan ta traha diariamente den i ku e sektor di turismo i lo por duna un mihó bista kon e sektor ta funshoná i si enberdat introdukshon di un impuesto pa uso di playa ta benefisioso pa nos pais. Ta asina ku tin paisnan den region Karibense ta implementá tipo di impuestonan asina’ki kaba na bienestar di  naturalesa i medio ambiente. Pero pa por introdusí esaki na Kòrsou ta mas sabí pa investigá e bentaha- i desbentahanan di esaki i tambe deliberá tokante e montante ku ta mas kumbiniente pa kobra ku tur partido relevante na mesa promé. Mester tene bon na kuenta ku ainda falta mas fondo pa otro aspektonan di nos isla ku tambe e turista ta bai hasi uso di dje durante su bishita, manera por ehèmpel nos infrastruktura, bunitesa i limpiesa di áreanan turístiko (inkluso nos playanan), i seguridat di e turista. Tambe, ta importante pa tene kuenta ku e disponibilidat máksimo pa paga (maximum willingness to pay) di e turista ku ta bishitá nos pais i si akaso ku introdukshon di un montante asina haltu pa hasi uso di nos playanan lo hasi mas daño ku e ta trese benefisio pa Kòrsou.