Willemstad, — Personanan indokumentá mester spar pa asina por tin e rekursonan finansiero pa kubri gastunan médiko.

Direktora di Human Rights Defense, Inchi Witteveen, a indiká den un kòmbersashon ku Vigilante ku Human Rights defensa ta intermediá den diferente kaso di personanan indokumentá na momentu ku nan mester di yudansa sosial. Ta un echo ku personanan indokumentá tin miedu pa usa nan derechinan pa miedu di wòrdu deportá.

Ta asina ku apesar un persona di indokumentá, e persona tin derechi pa risibí kuido médiko ku òf sin fondo pa paga. Esei ta lei stipulá na Kòrsou. Apesar di e lei menshoná, un persona indokumentá, mes mester paga su gastunan médiko na momentu ku e risibí kuido médiko. Ta asina ku un persona mester paga e dòkter di kas riba forma kèsh òf si akaso e persona indokumentá wòrdu manda pa un spesialista e persona mester paga pa e konsulta na e speshalista tambe.

Den práktika, Inchi Witteveen di Human Rights Defense a indiká ku personanan indokumentá no ta spar pa e gastunan médiko. Ta pesei, e direktora a indiká ku e ta supliká tur persona ku no tin un status legal na Kòrsou pa porfabor spar sufisiente pa asina por paga gastunan ku por subi riba mesa na momentu ku un persona indokumentá mester risibí kuido.

Na momentu ku un persona indokumentá presentá na CMC, e persona lo mester kuminsá paga un bòrg di 1500 florin pa asina evitá CMC krea un debe inesesario. Segun representante di CMC, Germaine Gibbs kon ku bo wak e, CMC mester duna kuido, pero e bòrg tambe ta importante. Despues di e kuido di emergensia, e gastunan ta wòrdu deskontá for di e bòrg. Na momentu ku un persona indokumentá presentá na CMC pa un konsulta, CMC ta kobra 85 florin akaso e persona no tin seguro adekuá.

Otro opshonnan pa ku finansiamentu di gastunan médiko ta enserá un karta di garantia di Krus Kòrá òf un karta di garantia di Fundashon Salú Pa Tur. “Den práktika por nota ku Ministerio di GMN sa finansiá personanan indokumentá ku ta duna lus”.

Pa 2024, Gobièrnu di Kòrsou a presupuestá un suma di 1.5 mion pa kada aña di 2024, 2025, 2026 i 2027 pa kuido di personanan indokumentá di CMC. Aktualmente, CMC tin un debe habrí pa tratamentu médiko di personanan indokumentá ku ta sumando 3.9 mion florin. E kuido médiko di CMC pa indokumentadonan tambe ta enserá kuido pa lucha kontra di entre otro tuberkulosis. Un di e sektornan ku ta produsí mas  gastu ta esun di remedi.