CMC mester brinda asistensia/kuido médiko di emergensia na personanan sin seguro i indokumentá.

Willemstad—-A base di lei, artíkulo 21 di e Ordenansa Nashonal di Institutonan di Salubridat, pais Kòrsou a determiná ku un fasilidat di hòspital (inkluyendo CMC) ta obligá pa risibí pashèntnan ku ta bai hòspital pa risibí kuido médiko di emergensia, na tur momentu na un forma efektivo.

Pais Kòrsou a base di Areglonan di Estado i areglonan internashonal ta responsabel tambe pa duna kuido médiko urgente na personanan sin seguro, inkluyendo personanan dokumentá òf indokumentá, registrá òf no registrá, ku ta biba legal òf ilegalmente den e pais. Awor ku pais ta rekerí ku CMC mester brinda asistensia/kuido médiko di emergensia na personanan sin seguro i indokumentá, pais ta responsabel pa asumí e gastunan di kuido aki. E gastunan aki ta suma 19,6 mion florin den e añanan di 2019 pa 2022, òf alrededor di 6,5 mion florin pa aña. E kompensashon di CMC pa e gastunan aki pa e añanan 2019-2022 a keda aprobá pa Konseho di Minister riba 15 di mart 2023. E kantidat di 19,6 mion florin a wòrdu pagá entretantu na CMC den trayekto. Manera por mira den e párafo anterior tokante pèrdida di entrada di impuesto i di primanan, indokumentadonan lo por kontribuí na e desénas di mionnan na e fondonan di BVZ i asina kubri nan gastunan di kuido médiko ku aktualmente ta alrededor di 6.5 mion florin pa aña.

E echo ku personanan indokumentá no tin akseso na kuido regular tambe ta nifiká ku hopi bia nan ta keda mas largu ku ta nesesario ku sierto malesa. Finalmente, esaki por kondusí na gastunan haltu di kuido médiko. Den kaso di malesa di transmishon seksual (SOA’s), tin e riesgo ku e propagashon di e malesa aki lo sigui mas largu kompará ku si un hende simplemente tabatin akseso na e tèstnan di SOA. E riesgo di propagashon aki no ta limitá solamente na e asina yamá “trahadónan seksual”, pero tambe ta afektá esnan indokumentá ku ta traha den otro industrianan. Akseso na kuido regular dor di permití personanan indokumentá paga primanan sosial i asina kai bou di seguro básiko di salubridat (BVZ) por limitá e riesgo aki.