WILLEMSTAD – Resientemente manera a sali den vários medio di komunikashon por a tuma nota ku mardugá di djaweps 21 sèptèmber 2023, a hasi detenshon di 19 persona ku a yega na nos kosta riba un lancha di forma ilegal na Piscaderabaai.

Ta trata di 7 hende hòmber, 7 hende muhé i 5 menor. Pa yega na un solushon temporal pa e menornan di edat, Ministerio di Hustisia a enkargá su instanshanan konserní pa sigui ku e proseso legal i alohá e menornan di edat teniendo kuenta ku e reglanan di e Tratado Internashonal di Derechonan di Mucha (IVRK).

E indokumentadonan a keda interseptá riba un lancha den oranan di mardugá djaweps último. Despues di yegada di e lancha na kosta di Kòrsou, algun persona indokumentá ku ya tabata na Kòrsou a mèldu na Departamento di Imigrashon indikando ku nan ta mayor di e muchanan ku a yega riba lancha. E personanan akí a keda detené riba sospecho di trafikashon di hende. Mirando ku okupantenan di e lancha ta indokumentá i tabata kompañá pa 5 menornan a habri un investigashon di trafikashon di hende.

Pa loke ta trata e bienestar di e menornan; segun prosedura di Ministerio di Hustisia e menornan a keda entregá na un instansia apropiá pa mucha ku ta sigur i konfiabel miéntras ku ta wardando resultado di e investigashon. Pa protekshon i seguridat di e menornan, no por divulgá informashon di nan alohamentu.

E investigashon di trafikashon di hende ta wòrdu ehersé bou responsabilidat di Ministerio Públiko, i mester warda resultado di esaki pa tuma e pasonan nesesario. Ministerio di Hustisia lo sigui hasi tur esfuerso pa protehá derechinan humano i derechinan di mucha.