Total bakuna suministrá mundialmente

PUNDA- Mundialmente mas ku 1.43 bion shòt di bakuna a keda suministrá. Esaki ta buta ku ya 9.4% di e poblashon mundial a risibí por lo ménos un shòt di bakuna. Distribushon di e bakuna mundial no ta kana pareu, paisnan mas desaroyá su trayekto di bakunashon ta kana 25 bia mas lihé kompará ku paisnan pober. Sinembargo, meta kolektivo mundial ta pa huntu yega un porsentahe haltu di personanan bakuná pa asina por kombatí e pandemia di Covid-19 pa medio di inmunidat kolektivo.

Awor ku vários pais na mundu a kuminsá ku e trayekto di bakunashon, diferente persona ta kuestioná efektividat di e bakuna. Motibu di esaki ta ku awor ku paisnan tin un porsentahe di nan poblashon bakuná, sifranan ta keda wòrdu publiká di e tasa di infekshon serka personanan kompletamente bakuná. Infekshon despues di bakunashon no ta algu nobo, e fenómeno aki ta konosí komo infekshonnan “revolushonario” òf “breakthrough infections” den e mundu sientífiko.

Maske ku bakunashon ta un konsepto ku ta eksistí pa dékadanan kaba, ainda e tema di infekshon despues di bakunashon ta keda unu ku ta trese hopi preokupashon den sosiedat. Hopi ta kuestioná funshon di e bakuna si e no por evitá kontagio kompletamente.

Pensamentu ku e bakuna kontra Covid-19 mester evitá infekshon kompletu no ta unu korekto ni hustu debí na e simpel echo ku ningun bakuna òf remedi no ta funshoná 100%. Bon notisia ta ku e bakunanan aprobá kontra Covid-19 te ainda ta mustra resultadonan sumamente eksitoso.

Investigashonnan ku a keda hasí mundialmente ta mustra ku e bakunanan kontra Covid-19 tin un efektividat di mas ku 90% riba protekshon kontra enfermedat severo kousá pa e vírus di Covid-19. Mester realisá ku e sifranan aki ta resultadonan sumamente haltu den e mundu di medisina. Segun Tom Clark, direktor di e unidat pa evaluashon di bakunanan na sentro di kontròl prevenshon di enfermedatnan (CDC) na Estados Unidos, e efektividat haltu di funshon di e bakunanan aki ta loke mundu mester si nos ke kombatí e pandemia aki.

Si analisá e sifranan di bakunanan lokal statistikamente, kual ta respektivamente 94 i 95% efektivo pa Moderna i Pfizer, por saka afó ku algun persona ku a keda kompletamente bakuná aun por keda infektá i hospitalisá pa e vírus di Covid-19.

Sinembargo e probabilidat pa e tipo di kasonan aki sosodé ta ekstremadamente abou.

Si wak e sifranan di Estados Unidos, den luna di aprel a registrá 9.245 persona di 95 mion ku a keda bakuná, infektá pa Covid-19. Esaki ta ménos ku 1% di e poblashon bakuná.

E resultadonan aki no ta nada preokupante pa sientífikonan, infekshon despues di bakunashon ta un echo i ta pasando pa dékadanan kaba ku otro malesanan manera por ehèmpel grip.

Ainda no ta konosí sí aki na Kòrsou tin kasonan di infekshon serka personanan kompletamente bakuná. Lokual ta konosí ta ku alrededor di 50% di nos poblashon a risibí nan promé shòt i kasi 30% a risibí ámbos dósis di bakuna. Segun dr. Gerstenbluth no tin resultado riba e asina yamá “breakthrough infections” ainda, e sifranan aki ainda ta bou di investigashon. Si e epidemiologo lokal a konfirmá ku a bou di personanan ku a risibí 1 shòt di bakuna si a registrá infekshon kousá pa e vírus di Covid-19.

Tur hende su respuesta inmunológiko kreá dor di bakuna ta diferente, meskos ku e reakshon di nos kurpa riba e vírus di Covid-19 tambe ta varia serka personanan.

Diferente aspekto ta hunga un ròl den infekshon ku Covid-19 despues di bakunashon. Periodo di inkubashon di un vírus òf e tempu entre infekshon i e síntoma aparesé, por varia ampliamente, di 10 pa 14 dia pa sarampi, un promedio di 6 dia pa Covid-19 i un par di dia òf ménos pa grip. Mas kòrtiku e periodo di inkubashon ta, mas chèns e vírus tin pa plama promé ku nos kurpa krea un respuesta inmunológiko. Otro faktor importante ta variantenan ku e vírus di Covid-19 a bin ta desaroyá. Te ainda no tin prueba ku e variantenan konosí ta kousando e asina yamá “breakthrough infections”, investigashon riba esaki tambe ta kanando.

E benefisionan di bakunashon ta mas ku solamente evitá infekshon. E bakuna kontra Covid-19 ta pruebá di ta redusí gravedat di infekshon i mortalidat serka personanan bakuná. Sifra spesífiko riba esaki ta bou di investigashon na diferente pais internashonal. Redukshon den severidat di malesa i mortalidat ta krítiko pa mundu por bai bek na bida “normal”. Pa e motibu aki mundialmente paisnan ta purba pa yega inmunidat kolektivo mas lihé posibel pa medio di bakunashon.