Na Kòrsou nos ta usa gas natural por gran parti pa kushiná, pero otro paisnan ta dependé di gas natural pa tene nan kasnan kayente den temporadanan di frieu.

Willemstad,– Mirando e desaroyo di nos sektor lokal di energia, ta esensial pa kubri e diferente aspektonan di energia.

Den 2023 ‘International Energy Agency’ a publiká den nan análisis tokante e futuro di e merkado di krudo i gas ku e siglo di oro di e sektor di gas natural a kuminsá den aña nan 2011. Den e mesun frase e International Energy Agency(IEA) ta agregá ku e siglo di oro ta yegandi na su fin. E siglo di oro ta relatá na e oumento mundial atraves di añanan tokante uso di gas natural. Na Kòrsou nos ta usa gas natural por gran parti pa kushiná, pero otro paisnan mas frieu ta usa gas natural pa keinta nan edifisionan tambe. Segun análisis di IEA, for di 2011 uso di gas natural a oumentá tur aña ku 2%. Pero último añanan e kresementu den uso di gas kuminsá baha. E análisis ta asta indiká ku tur kos ta mustra ku pa 2030, uso di gas natural lo oumentá solamente ku 0.4% pa aña.

Den e mesun investigashon di IEA e organisashon a nota ku e region Latino Amérika i Karibe ta bai eksperenshá un oumento den demanda di krudo i demanda di gas (natural). E demanda ta sigui krese te ku 2050 i segun IEA, e oumento di demanda ta debí na kresementu ekonómiko den un region ku a risibí sla duru durante Covid-19. Sinenmbargo kalkulashon nan ta demonstrando ku e oumento den produkshon di energia, tantu den forma di koriente komo gas natural ta bai oumentá entre 10% pa 35% te ku 2050.

Den tur e islanan karibense a resultá ku Trinidad & Tobago ta na segundo lugá di e pais ku ta eksportá mas gas (natural). Apesar ku Trinidad & Tobago ta un dje paisnan mas grandi den e sektor di ekportashon di gas, IEA a remarká ku e eksportashon den 2022 ta 20% ménos ku e eksportashon máksimo di 2019.

E sifranan aki den komparashon ku Merka, por nota ku Merka lo sinti un redukshon fuerte den demanda di produktonan petrolero manera gas (natural) i krudo. E rason tras di e reduashon, por gran parti ta debí na vehíkulonan eléktriko. For di e investigashon por dedusí ku pa 2030, 50% di vehíkulonan nobo ku wòrdu registrá lo ta outonan elektróniko.

Durante un reuda di prensa tokante un ‘swap deal’ kaminda debe atrasá di PDVSA lo wòrdu pagá den forma di produkto petrolero, e promé minister, Pik Pisas, a anunsiá plan nan di un gasdukto. Pisas a splika ayera ku e “gasdukto” lo bira un konekshon pa suministrá gas entre Kòrsou i Venezuela, kual di mes lo generá tambe e kuponan di trabou nesesario. Sinembargo, segun Pisas, e promesa di konstrukshon di e gasdukto ta unu ku representantenan di PDVSA a konfirmá durante nan kòmbersashonnan.