Jean Francisca

BRIEVENGAT—Eks presidente di FFK, Rignal Jean Francisca ainda ta fungi komo vise presidente di Caribbean Football Union. CFU ta e federashon di futbòl representante di 25 pais den Karibe i 6 teritorio. E federashon a keda establesé na 1978 i su miembronan ta hunga i kompetí internashonalmente bou di CONCACAF.

CFU a bira popular no pa nan prestashonnan internashonal sino pa e skandal di korupshon ku a mancha FIFA internashonalmente, despues ku figuranan di CONCACAF huntu ku Jack Warner di CFU a start un seri di korupshon i pagonan pa relashoná ku Mundial di Qatar. A keda menshoná ku miembronan di CFU kada unu a risibi ènvelòp ku 40 mil dòler kèsh aden, den lokual despues a start tambe investigashonnan federal na Estádos Unídos ku a kondusí na aresto. Na Kòrsou, Francisca a desmentí ku FFK tabata envolví den e skandal.

CFU ta bini bèk den “playing field” awor ku CFU ta bira e organisashon envolví den kuadro di Caribbean Club Shield. Un torneo organisá pa CFU, despues ku Concacaf a deshasí di e responsabilidat pa organisá e torneo. E situashon por bira interesante ku Jean Francisca manehando e torneo pa CFU, komo vise presidente i su rival, Ramiro Griffith kende a deskubrí inkumplimentunan finansiero/fiskal durante añanan di maneho bou di Francisca.