Grabashon kaminda por wak kon e kachónan tabata tratando na subi e muraya.

BEURS,– Ayera despues ku Kòrsou a keda sorprendé ku a kantidat grandi di awa, redakshon di Vigilante a risibí grabashon kaminda dos kachó a hera di hogá na momentu ku nan kurá a yena ku awa.

Por a wak riba e grabashon di 1 minüt kon dos kachó tabata den awa ta landa tratando di  subi un muraya kaminda un terser kachó si tabata riba e muraya purbando na yuda e dos otro kachó nan. Na momentu di skibi e relato aki Vigilante no sa e estado aktual di e kachónan, pero e dama Dulce Bonifacio a indiká ku e ta bai den e área pa asina investigá e suseso.

Bonifacio kende tur dia di nobo ta lucha pa promové bienestar di kachónan a indiká ku na momentu ku el a wak e video e no por a drumi mas. Segun e dama, e ta bai na e kas na Kaya John Willekes pa asina buska un solushon pa nunka mas e kachónan no haña nan den tipo di problema asina mas. Bonifacio a asta indiká ku e ta dispuesto na traha buraku den e muraya grátis pa asina evitá un situashon similar den futuro ku e kachónan den e kurá den Kaya John Willekes.

Kaya John Willekes ta situá den e bario di Beurs i e skina di e kaya menshoná ta konosí di tin problema ku awa. Segun informashon, durante tormenta Thomas na 2010 habitantenan na e skina di Kaya John Willekes a spanta momentu ku henter e kashi koriente di Aqualectra tabata bou di awa. Durante e tormenta di 2010 un èks habitante den e área a indiká ku e kashi koriente tabata chispa i saka kandela di 3 meter haltu.