Kasonan di atrako a baha konsiderablemente.

WILLEMSTAD – E Informe Anual di Ministerio Públiko di aña 2022 ta indiká meskos ku e resultadonan di añanan anterior, e kantidat di atrakonan ta disminuyendo i aña pasá no tabata un eksepshon. E kantidat di sospechosonan registrá pa violensia ku arma di kandela tambe a baha poko. Pero e rapòrt ta mustra tambe ku a detené basta menor di edat. Pa e dos tipo di krímennan menshoná akí, sigur 16 menor.

A registrá un kantidat di 61 sospechoso di atrako aña pasá, di kua 43 sospechoso a risibí un sitashon pa presentá dilanti hues. Ta parse ku e gruponan di kriminal persistente ta responsabel pa e gran mayoria di atrakonan kometé. E enfoke prioritario di Ministerio Públiko porlotantu ta riba e gruponan akí. E enfoke di Ministerio Públiko probablemente ta kontribuí na e tendensia di bahada den kantidat di atrakonan ku Ministerio Públiko ta mira.

Pa loke ta trata violensia ku arma di kandela, a registrá un kantidat di 105 sospechoso aña pasá ku tabata den poseshon ilegal di arma di kandela òf munishon. Di e kantidat akí 13 tabata menor di edat. I 87 persona di e total a risibí un sitashon pa presentá dilanti hues. Segun Ministerio Públiko, ta trata akí di solamente 8 sospechoso mas kompará ku 2021, pero e ta ménos kompará ku e kantidatnan registrá durante añanan anterior. Ademas Ministerio Públiko a kontinuá koperando ku e sosionan den kadena hudisial i a sigui partisipá den e ‘Actiecentrum Ondermijning Curaçao’ (ACOC). ACOC ta un asosiashon di instansianan gubernamental ku ta enfoká riba temanan di seguridat aktual, inkluyendo e enfoke integrá, tantu penal komo atministrativo pa kombatí por ehèmpel violensia ku arma di kandela.

Pa loke ta trata delitonan seksual, Ministerio Públiko a komprometé na mehorá e trato di víktimanan. Por ehèmpel Ministerio Públiko a invertí den e promoshon di e ekspertisio di e empleadonan dje lokèt di víktimanan. Tambe a publiká un pelíkula informativo riba e página di internèt di Ministerio Públiko, ku e fin di informá esnan ku ta mèldu òf entregá denunsia di delitonan seksual. E vidio ta splika kòrtiku kiko por spera djesnan ku ta mèldu òf esnan ku a entregá denunsia, i kua ta e método di trabou di Kuerpo Polisial Kòrsou, Ministerio Públiko i slachtofferhulp den kasonan di delito seksual.

Ademas a organisá reunionnan ku víktimanan pa e víktimanan òf e denunsiantenan (den hopi kaso, mayornan di víktimanan menor di edat), pa promé ku e tratamentu di e kaso den Korte, nan haña e oportunidat pa hasi pregunta tokante loke por spera den sala di Korte. Ministerio Públiko a invertí den e koperashon di sosionan di kadena hudisial, por ehèmpel atrabes di e asina yamá ‘kasonan di mesa’. Den un kaso di mesa, ta diskutí kasonan spesífiko ku e sosionan relevante di e kadena, pa por tin mas personalisashon i kordinashon di e kadena. Esaki por inkluí kasonan di delitonan seksual den kua tantu e víktima komo e sospechoso ta menor di edat. Aña pasá a registrá 23 sospechoso di un delito seksual, 3 di kua tabata menor di edat. Esaki a varia entre kometé aktonan inaseptabel seksual te na violashon seksual. Kompará ku aña pasá por papia di un bahada leve. Di e 23 sospechosonan, 18 a risibí un sitashon.

Ministerio Públiko a para ketu tambe na e sifranan di kiebro i ladronisia. Aña pasá a registrá 66 sospechoso ku a kometé un òf otro forma di kiebro, sea den kas, den kompania òf di outo. Di e kantidat akí 53 sospechoso a risibí un situashon pa presentá dilanti hues.