Back to Top
Responsive image
E korant di pueblo

Kantidat di kama hospitalario i tasa di bakunashon ta desisivo pa medidanan lokal


October 12, 2021 • 2 minüt pa lesa

Iralice Jansen: Epidemiólogo lokal i alabes kabes di trayekto di bakunashon na Kòrsou.

PUNDA- Segun enkuesta ku a keda hasí pa tim di epidemiólogia na Kòrsou, no tin un motibu konkreto pakiko personanan ku no ke bakuná ta ninga e bakuna.

Manera ya ta konosí, for di komienso di e kampaña di bakunashon ekspertonan lokal a duna di konosé ku e meta prinsipal ta pa logra bakuná gran mayoria di e poblashon di Kòrsou. Ekspertonan internashonal, inkluyendo Organisashon Mundial di Salú (WHO), a informá na komienso di e pandemia ku nan ta di opinion ku paisnan mester yega un tasa di bakunashon di por lo ménos 85% pa asina logra papia di inmunidat kolektivo.

Sinembargo, komo ku e pandemia aktual ta kontené un vírus relativamente nobo pa mundu kompletu, ningun eksperto no por duna un porsentahe konkreto ku mester bakuná pa e yega inmunidat kolektivo. Segun epidemiólogo lokal, Iralice Jansen, durante un pandemia semper ekspertonan ta usa informashon ku ta na alkanse den momentu. Pa e motibu aki a bisa den komienso ku e ophetivo di bakunashon ta 85%. Tambe WHO a duna di konosé for di prinsipio ku mas haltu e tasa di bakunashon ta mas mihó esaki ta pa protekshon di un poblashon kontra brotenan kousá pa e vírus.

E pandemia aktual aun ta den desaroyo, esaki ta nifiká u aun e vírus ta mutua. Pa e motibu aki ekspertonan internashonal i lokal, mester keda tene kuenta ku esaki promé ku por duna un porsentahe konkreto riba e kantidat di bakunashon nesesario pa yega inmunidat kolektivo. Un sifra ofisial aun no ta eksistí pa motibu ku ningun hende no sa esaki. Sinembargo, ta importante pa realisá ku e medidanan lokal ta keda ahustá abase di e kantidat di kama ku ta okupá den hospital i e tasa di bakunashon di e poblashon.

Análisis konduktá riba e kantidat di personanan ku a bakuná na Kòrsou ta mustra ku alrededor di 70% di nos poblashon a risibí un mínimo di un bakuna. Sinembargo, e porsentahe di persona kompletamente protehá kontra e vírus di Covid-19 aun no a surpasá 65%. Outoridatnan lokal ta spera di por logra oumentá e tasa di bakunashon den poblashon pa asina por garantisá un protekshon mas mihó kontra posibel brotenan den futuro di e vírus di Covid-19.

Pa medio di un enkuesta tim di epidemiologia a purba na veriguá kiko e motibu prinsipal ta pakiko personanan ta ninga e bakuna kontra e vírus di SARS-CoV-2. Resultado di e enkuesta aki no a duna un kontesta konkreto riba e pregunta prinsipal, lokual si a sali na kla ta ku diferente persona no a bin tuma e segundo shòt di bakuna, algun persona a lubidá, otronan a duna di konosé ku nan no a haña liber di trabou i tin algun persona ku no ta mira e urgensia pa bakuná, esaki Jansen a informá.

Login