DEN HAAG—E kantidat di hogarnan den Hulanda ku entrada riba un mion euro a bolbe oumentá den 2021.

Asina Ofisina di Estadistika CBS a informa a base di sifranan mas resien. Ta di 7 aña konsekutivo ku e kantidat di mionarionan ta subi. Den yanuari 2021 e kantidat di hogarnan mionario a alkansá 317.000, un oumento di 32.000 kompará ku 2020. E promedio mionario tin un kapital di 1,6 mion euro. Un kuart di mionarionan tin un kapital entre 2 i 5 mion euro i 3% di mionarionan tin mas ku 10 mion euro. Den e kapital CB a inkluí balor di e kas i debe di hipotek. Un hogar ku no ta mionario tin un promedio entrada di 75.000 pa aña. 66% di mionarionan ku ta traha ta empresario individual. Den agrikultura por ehèmpel, 42% ku ta independiente tabata mionario den 2021. Mayoria kapital di agrikultornan individual ta den edifisionan, tereno i mashinnan. Den servisio finansiero i benta di kas/terano tambe tin hopi empresario independiente mionario. Un tersera parti di minarionan a baha ku penshun i 22% ta traha den servisio di un kompania. Segun CBS munisipionan di Bloemendaal i Laren tin mayoria mionario. Den e munisipionan aki 3 riba 10 hogar ta mionario. Munisipionan na Limburg manera Kerkrade, Brunssum, Landgraaf i Heerlen ta den minoria ora ta trata mionarionan meskos ku Nissewaard. Den 2020 un investigashon a indiká ku 25% di e kapital total den Hulanda ta den man di 1% di hogarnan. Konseheronan a rekomendá pa bini ku diferente medidanan di belasting pa repartí e preshon di belasting mas hustu.