HOOFDDORP—Na Amsterdam  organisashon di hende muhe Wichmann a kuminsá un kaso ayera kontra e kompania di implante di pechu Abbvie.

E demanda di daño por alkansá te 900 mion euro. Mas di 6000 dama a meldu pa e daño perhuisio. Nan ta di opinion ku e implante di pechu ku nan tin ta defisiente. Ta trata di implantenan ku un superfisie grof ku yama Biocell of Natrelle di e fabrikante Abbvie (antes Allergan). E damanan ku a  mèldu na e organisashon kier saka e implantenan pa motibu di risiko di seguridat. Tin indikashon ku hendenan ku tin e implantenan ta kore mas risiko riba un forma di kanser di lymfe, ounke e chens ta chiki segun RIVM den un investigashon di 2017. Damanan ku implantenan tin 400 biaha mas risiko pa haña un tipo di kanser. E chens ku un dama haña e forma di kanser aki ora e tin 75 aña ta 1 riba 7000. Den Hulanda tin 90 dama ku e implante kaminda BIA-ALCL a keda konstatá. E grupo di damanan ku implante ta teme e forma di kanser aki. Tin un total di 60.000 dama den Hulanda. E kompensashon ku ta pidi ta pa saka e implante i rekonstrukshon di e pechu. Tambe mester kompensa e sufrimentu i dolor ku e intervenshon ta okashoná. E organisashon di derechonan di hende muhe kier e kompensashon pa tur hende ku kier saka e implante. E demanda ta 900 mion euro a base di e kantidat di 60.000 dama ku e implante. For di 2018 no por haña e implantenan mas den Oropa. Den 2019 Abbvie saka nan for di sirkulashon. Inspekshon di Salubridat ta bias ku no mester saka e implante i ku tin risiko tambe na e operashon. Tambe mester konsulta un dokter den kambionan of kehonan. Un hurista di Bureau Clara Wichmann ta bias ku parti di e damanan tin kehonan di salu sin sa e motibu. E kompania farmaseutiko no kier a reakshoná riba e kaso mientras e ta den korte.