Zaquito – Via di vigilansia epidemiológiko den kolaborashon ku laboratorionan, Servisio di Salubridat Públiko di Kòrsou (UO G&Gz ántes GGD) ta konfirmá sirkulashon di e vírùs di Dengue.

Den e delaster simannan di 2023 a konfimá algun kaso di Dengue i durante yanüari e kasonan a sigui oumentá. Na total a konfirmá trinta-un (31) kaso di Dengue i un (1) kaso di Chikungunya den e último 6 simannan. Oumento den petishon pa tèst na laboratorio i oumento di kasonan paresido na Dengue serka dòkternan di kas, ta indiká ku e malesanan aki ta sirkulá i a kuminsá plama. Ta importante pa keda kòrda ku síntomanan di Dengue, Chikungunya i Zika ta parse otro. Ta tèst pa tur tres malesa i te ainda a konstatá ku práktikamente tur a tèst positivo pa Dengue. Importante ta ku komunidat no mester duna e malesanan aki chèns di plama.  

Manera nos tur sa, ta e sangura ku nos konosé ku strepi blanku ku pretu ku nòmber Aedes aegypti, ta e sangura ku ta plama e vírùsnan ku ta kousa Dengue, Chikungunya i Zika.  E sangura Aedes aegypti ta biba mei mei di nos basta si nos laga nan. Una bes nos laga nan, e sanguranan aki ta multipliká di forma rápido i asina nan ta chupa sanger ku ta kontené e vírùs i ta plama esaki (dor di pika otro persona) i asina por kousa un epidemia.  Ministerio di GMN pa basta ratu ta kana den barionan pa atendé i eliminá fokonan den kual sangura ta brui. A bishitá lugánan ku ta bende i/òf drecha tayer, skolnan, institutonan i otronan pa yuda komuniká e peliger di sangura i tambe yuda eliminá fokonan kaminda e sangura ta broei.  Ministerio di GMN mester di komunidat kompleto pa yuda nos. NOS SO NO POR HASIE! 

Entretantu un yamada urgente ta bai na tur hende pa tuma un òf mas akshon manera:   

AKSHON NA KAS 

Kontrolá paden di kas pa bo no tin pòchi mata ku awa aden den kual sangura por pone su webunan. Por evitá sangura di pone webu den esaki dor di remplasá e awa ku tera. Òf kambia e awa un biaha pa siman. Kontrolá e skòter bou di pòchi; pone santu òf tera den e skòter. Aquarium ku awa para sin piská aden tambe por sirbi komo lugá kaminda sangura por pone webu aden. Pone piská den esaki. Por último semper por pasa tuma ABATE na Piscaderaweg 49 pa trata e awa pará.

Kontrolá pafó di kas dor di kana rònt den kurá kaminda bo ta biba. Paga bon tinu kamindanan ku ta skur i sukú manera bou palu kaminda ku por tin artefaktonan manera hèmber, bleki, tayer, bòter, foam di kuminda, kos di hunga i hasta baki di awa pa kachó.  Por hasi lo siguiente: Tira lokual bo no usa afó. Kaminda no por eliminá esaki, bora esaki den e bòm di manera awa no por keda pará òf yena esaki ku tera. 

Kontrolá renbak òf baki ku ta fangu áwaseru. E mihó kos ta pa pone piská den e baki òf renbak.

Si bo ta usa bari òf e containernan di plèstik pa fangu awa, tira abate den esakinan.

Kòrda riba goot ku por tin blachi aden i ta wanta awa. Limpia esaki.

•Berpùt ku ta habrí òf ku skèrnan asta hopi chikitu, tambe ta sirbi pa lugánan kaminda sangura ta bai pone webu.  Laga sera esakinan hermétikamente. Tambe por flush kerosin den berput, pero kòrda ku esaki ta un medida tenmporal komo ku e kerosin ta evaporá.

Protehá bo mes kontra piká di sangura dor di hunta bo kurpa ku repelentenan ku ta kontené e kímiko DEET. Por haña esaki ta botika i supermerkadonan.

AKSHON PA NEGOSHINAN  

Lugánan kaminda tin industria di bendementu di auto segunda mano, kontratista, lasmentu, boteyamentu, lugánan di flor mester evitá ku tin kos nan para ku awa aden.  

Tayer ku awa aden ta forma un lugá perfekto kaminda sangura gusta pone su webunan aden. Tayer ta skur i e awa su temperatura den e tayer ta perfekto pa sangura. Luganan di tayer mester pone tur tayer bou dak òf tira tayernan ku no tin uso afó.     

Ta e sangura Aedes aegypti ta e yabi pa pasa e malesanan di Dengue, Chikungunya i Zika. Gobièrnu só no por kaba ku sangura. Sangura por keda eliminá si nos eliminá tur kos kaminda sangura por pone webu aden. Hasi bo parti.  Nos lema ta : NO DUNÉ UN CHÈNS! 

Ministerio di GMN ta keda disponibel pa e siguiente servisionan:

–             Petishon pa duna informashon pa programanan por bèl Sra. Jurina Römer na 524.0856

–             Pa Keho tokante e.o. sangura  por bèl na tel 432 2867

–             Pa HOTLINE di THZ por manda voice òf video via Whats-app 527 0854

–             Pa ABATE por pasa na Piscaderaweg # 49 entre 08:00- 12:00 durante dianan di ofisina.