WILLEMSTAD,—-Den fin di siman tras di lomba a yega un trit masha special na Curaçao Medical Center (CMC).  E fundashon di pelotero profeshonal i yu di Kòrsou, Kenley Jansen a pèrkurá pa un almuerso di gratitut pa tur boluntario.

“Tantu ami i mi kasá Gianni tin un kompromiso masha spesial ku Kenley Jansen Foundation. Na e okashon aki nos ke mustra apresio na tur esnan ku diariamente ta entregá nan tempu, i den esaki ta lubidá nan mes pa yuda otronan. E kontribushon di tur boluntario i frontliner pa kuida esnan ku ta den unidat spesial di Covid-19 na CMC, ta impagabel. Sinembargo, nos ke a brinda tur un mèrdia spesial i gradisí nan pa e tremendo trabou ku nan a bin ta hasi.”  

Djasabra mèrdia, a repartí 350 sukulento ‘grill’ kompañá pa un djus na tur boluntario i staf médiko di CMC. Un tim dediká a pèrkurá pa un mèrdia kontentu pa tur frontliner.  Kenley Jansen Foundation ta gradisí tur esnan ku a prepará e almuerso i tambe e tim lokal di e fundashon ku a kordiná e logístika.

Kenley Jansen Foundation, e fundashon presidí pa e pelotero di LA Dodgers i yu di Kòrsou,  Kenley Jansen tin komo mishon pa kontribuí di un manera positivo na bida di famianan ku tin muchanan ku enfermedat króniko. Nan ta proveé sosten mediante rekursonan ku ta mehorá bida di mucha, i ta krea eksperensianan transendental. Tambe, e fundashon tin diferente programa komunitario na Los Angeles, un di esnan mas popular ta Kenley’s Locker ku ta duna e mucha i su famia akseso na un “locker di Kenley” ku unidatnan elektróniko di manera ku nan por distraí miéntras ku nan ta risibí tratamentu médiko i ta den rehabilitashon.

Kenley Jansen Foundation ta gradisí tur partner, kontribuidó i donante pa nan sosten kontinuo. Ta enkurashá komunidat di Kòrsou pa sigui kuida di manera ku pronto nos por disfrutá di e Kòrsou ku nos tur ta stima. Riba fotonan athunto un impreshon di djasabra mèrdia na CMC.