Minister Cooper a informá parlamento aña pasá ku a kuminsá deliberá ku e kompania enkargá ku parkermentu pero ku trabounan lo kuminsá ora firma kontrakt.

Willemstad, — Parker den sentro di siudat ta bira kada dia mas i mas difísil. Minister Cooper a kontestá pregunta di parlamentario aña pasá ku a kuminsá deliberá ku e kompania enkargá ku parkermentu pero ku trabounan lo kuminsá ora firma kontrakt.

Lugá pa parker den sentro di siudat ta forma un problema serio ya komo e kantidat di lugánan di parker no ta sufisiente. Esaki ta di lamentá pasombra sentro di siudat ta hunga un ròl importante pa bishitantenan pero tambe pa personanan ku ta bishita sentro pa ehersé nan trabou. Na 22 di ougùstùs di 2022  Zita Jesus-Leito a hasi pregunta na minister Cooper tokante lugá di stastoná vehíkulo. E Parlamentario a manda un karta ku 7 pregunta ku tópiko ‘Minister a regla pa pueblo di Kòrsou por disfrutá di lugánan di parker na òrdu den Punda i Otrobanda?’. Minister Cooper a kontesta e preguntanan desèmber 2023 splikando entre otro ku gobièrnu ainda ta negoshando ku e kompania ku a gana e destaho públiko pa bira operadó di lugá di parker den sentro di siudat (Punda i Otrobanda).

Na mart 2022 lei a duna apoderashon na gobièrnu pa firma un kontrakt ku PAC/Global Metals a drenta na vigor. E kontrakt lo kubri e periodo di 2010 pa 2020 ku a pasa kompletamente kaba. Konforme e kuadro di palabrashonnan, pa medio di un asina yamá arbitrahe lo mester determiná e montante ku Global Metals lo mester bai paga pa e periodo di e kontrakt.” Zita Jesus Leito tabata ke sa si Cooper a firma e kontrakt ku PAC, Global Metals N.V. kaba i ki dia esaki a tuma lugá. Minister Cooper a kontestá aña pasa desèmber: “Nò, no a firma un kontrakt ainda. E asuntu akí ta pendiente i ta parti di e trayekto konosí komo ‘Roadmap naar goedkeurende controleverklaring bij de jaarrekening Curaçao’. Segun Cooper, e montante final ta dependé di e negosiashonnan i arbritahe ku ainda no a tuma lugá.

Jesus-Leito tabata ke sa seguidamente kon leu ta ku e kontrakt nobo pa un operadó di lugánan di parker den Punda i Otrobanda. Minister Cooper a kontestá: “Despues di e destaho ku a tuma lugá i a skohe e kompania ku a gana, a kuminsá deliberashonnan ku e kompania akí pa yega na un kontrakt. E deliberashonnan akí ta kanando bon i ta den fase final.” E Parlamentario a puntra tambe ta kua kompania/organisashon a gana e destaho públiko i ta bira e operadó nobo. Cooper: “E kompania yama ‘Stichting Willemstad Parkeer Beheer’.” Riba e pregunta ki dia e kompania ku ta enkargá ku parkermentu den sentro di siudat lo kuminsá, Minister Cooper a kontestá ku lo determiná esaki na momentu ku firma e kontrakt. Finalmente Jesus-Leito tabata ke pa Minister Cooper splika kiko e maneho di parkermentu den Punda i Otrobanda lo bira.

Cooper: “E maneho lo keda manera e tabata anteriormente, ku un ahuste pa krea posibilidat pa trese inovashon den e maneranan ku por paga i tambe pa loke ta trata e kantidat di lugánan di parker.”