Willemstad,   Proveedor lider di telekomunikashon Flow, a lansa un programa pa duna sosten na su klientenan residensial kende por ta konfrontando difikultatnan finansiero.

Klientenan ku a kai atras ku pagonan lo no keda suspendé, pero lo keda pasá pa un pakete spesial ku ta duna nan e posibilidat di risibí servisionan básiko di internèt i televishon, mientras ta traha huntu pa resolvé nan saldo habrí.  “E aña ku a pasa tabata sumamente difísil pa hopi persona. No ta un sekreto ku desempleo ta haltu, famianan ta den situashonnan finansiero difísil, i algún no por paga nan fakturnan n’e momentonan aki. Konsiente di esaki, i komprondiendo e nesesidat pa nos klientenan tin un forma di entretenimentu i komunikashon, nos a krea e ‘Plan di Komprenshon’ pa mantené nan konektá,” Danny Macaya, Country Manager pa Flow Kòsou a indiká.

“E inisiativa temporal aki lo duna nos klientenan un tempu mientras nos ta kuminsa mira nos isla lanta bèk riba pia. Pa nos ta importante pa ta un partner pa nos komunidat. Nos ta komprondé e retonan i nos tei pa yuda nos klientenan sigui lucha pa surpasá e tempunan yená ku reto aki.” Klientenan ku a keda pasá pa e plan temporal aki lo risibí un mínimo di konektividat ku lo hasi posibel pa nan keda konektá durante e lunanan benidero.

“Esaki ta un plan transitorio ku ta sirbi komo un brùg den e periodo aki durante kua nos tim di Customer Service lo traha di aserka ku nos klientenan ku e meta pa por yega bèk na nan konekshonnan i paketenan anterior,” señor Macaya a añadí.  “E kompania a rekonektá algun shen kliente kaba kende tabata deskonektá pa motibu di pagonan no risibí, i e tim ta sigui drenta den kontakto ku klientenan ku por bini na remarke pa informá esakinan di e opshon pa pasa riba e ‘Plan di Komprenshon’.