KLM mester paga algu mas di 19 mil euro pa violashon di regulashonnan
di e asina yamá Verordening (EG) nr. 261/2004.

AMSTERDAM/WILLEMSTAD – E kompania di aviashon KLM mester paga algu mas di 19 mil euro pa violashon di regulashonnan di e asina yamá Verordening (EG) nr. 261/2004.

Diferente pasahero a akusá KLM di no kumpli ku e reglanan relashoná ku yudansa na pasahero, rechaso di paga preis di pasashi bèk, i falta di informashon adekuá na pasaheronan tokante nan derechonan. Asina Korte di Hulanda a disidí den un kaso entre KLM i e Minister di Infrastruktura i ‘Waterstaat’ di Hulanda, representá pa “Inspectie Leefomgeving en Transport” (ILT), tokante butnan atministrativo imponá riba KLM.

T’asina ku e kompania D-Reizen a bati bankrota riba 6 di aprel 2021 i despues di esaki, diferente pasahero a raportá na ILT ku nan no a risibí pago bèk di nan pasashi despues ku KLM a kanselá nan buelonan. ILT a start un investigashon i a saka dos rapòrt fechá 6 di òktober 2021 i 3 di mei 2022. Den ámbos rapòrt, ILT a konkluí ku KLM sistemátikamente ta violá e “Verordening”. KLM no a ofresé asistensia na pasaheronan di un total di dies buelo kanselá, ku a pidi esei. Ademas, KLM a rechasá na debolbé e preis di pasashi na e pasaheronan, ku ta violashon di artíkulo 5, den konekshon ku artíkulo 8 dje “Verordening”. Ademas den rapòrt di 3 di mei 2022, ILT a konstatá ku KLM vários biaha no a informá pasaheronan por eskrito tokante e reglanan pa kompensashon i asistensia. Esaki ta un violashon di artíkulo 14 di e “Verordening”.

Den e kartanan di 26 di òktober 2021 i 2 di yüni 2022, ILT a laga KLM sa ku nan tabatin intenshon di imponé un sanshon pa e violashonnan akí. KLM opiná kontra ámbos intenshon i ILT a imponé e sashonnan na KLM den dos desishon. Den apelashon, ILT a rekonosé ku nan a apliká e reglanan nobo inhustamente pa loke ta trata un dje kehonna i pa dos otro KLM a proba di no a kanselá e biahanan. Pa motibu di esaki, Korte a deklará e apelashon kontra e desishon impugná pa loke ta trata e tres kehonan akí.

Pa e sobrá kehonan, no tin disputa ku KLM a kanselá e biahenan enkuestion, no a ofresé e pasaheronan e opshon di skohe entre pago bèk di e preis di pasashi òf un otro buelo ni tampoko a debolbé e preis di pasashi na e pasaheronan, sino na D-Reizen. Tampoko ta den disputa ku D-Reizen tampoko a debobvé e preis di pasashi na e pasaheronan despues.

Den e kaso akí tabatin menshon spesífiko di Kòrsou, pasó KLM a argumentá ku e prohibishon di drenta paisnan ku tabata na vigor pa Merka, Polonia i Kòrsou na e momentonan di e buelonan tabata un motibu ku nan no por a ofresé buelonan alternativo na pasaheronan ku e destinashonnan akí. Korte a rechasá e argumento akí i a enfatisá ku ofresé un opshon entre pagamentu bèk òf skèdjùl un otro pueblo, manera ta preskribí den e “Verordening”, ainda tabata nesesario apesar ku un buelo alternativo no tabata posibel. Korte a fiha e suma di but ku KLM mester paga na 19.400 euro, na lugá dje suma original di 40.100 euro ku e demandantenan a pidi pa medio di gobièrnu hulandes.