Willemstad – Dia 3 di aprel 2023, Ministerio di Salubridat, Medio Ambiente i Naturalesa a hasi inisio di e proyekto di Klein Kòrsou kaminda Gobièrnu di Kòrsou ta bai risibí sosten di Union Europeo pa ehekutá e proyekto.

Via di un destaho a kontratá un büró pa manehá e proyekto ku e tarea pa hiba un kampaña di konsientisashon i komunikashon i pa hasi 4 estudio. A hasi un destaho kaminda a invitá nuebe diferente eksperto i na final di evaluashon téknikamente i finansieramente e konsorsio EcoSense i Carmabi a gana e destaho. E implementashon di e proyekto ta dura 12 luna i vários investigashon i seshon ku aktornan lo keda organisá.

E 4 estudionan ku lo hasi ta regardá diferente plannan di desaroyo duradero pa Klein Kòrsou. Ta trata aki di:
1 Implementashon di un sistema di pèrmit pa manehá uzo rekreativo i turístiko di e isla,
2 Kuadro di monitoreo pa evaluashon kontinuo di ekosistema di e isla,
3 Formulashon di un plan general di desaroyo,
4 Desaroyá un plan nashonal di konsientisashon i un plan di komunikashon.

Klein Kòrsou ta un isla inhabitá ku ta keda 11 km zùitost for di Kòrsou. E isla ta di sumo importansia ekológikamente, ekonómikamente i pa desaroyo urbano. Na 2018, Klein Kòrsou a keda designá komo un área di “Ramsar”.

Ramsar ta un pueblo ku ta ubiká na “Kaspische Zee” na e provinsia Mazandaran na e pais Iran kaminda na 1971 a firma un konvenio pa protekshon di paranan i tambe áreanan ku ta riku na awa.

Aktualmente den e Ordenansa Nashonal di Protekshon i Mantenshon di Naturalesa ta duna espasio hurídiko pa ankra e status di “Ramsar” den un ‘Landsbesluit’. Esaki tin ku tuma lugá paralelo ku e proyekto. Tambe ta importante pa menshoná ku e destinashon di Klein Kòrsou ta “Open Land”. E proyekto aki ta importante pa yega na un uzo optimal di Klein Kòrsou kaminda tur elemento presente lo mester ta den un bon balansa ku otro pa garantisá un desaroyo sostenibel.