Nieuwe Haven: Un ratu pasá korte di promé instansha a dikta sentensia den kaso “Themis”.

E akusado Robere Lucas a keda kondená na 14 aña di prizon. Pa loke ta trata e akusado Charlton Lake, el a keda kondená na 8 aña di prizon. Stephanie Philips a keda kondená na 6 aña di prizon i por último Adrian Evelina a keda kondená na 21 luna di prizon.

“Themis” ta un investigashon di krimennan kometé den diferente pais den Reino Hulandes i otro pais pafó di esaki. Speshal pa e investigashon aki a forma un tim di reshèrshi ku ta konsistí di miembro di kuerponan polisial di Sint Maarten, Kòrsou, Aruba i tambe e Tim di Koperashon di Reshèrshi (RST). E tim aki ta kai bou di mando di Ministerio Públiko di Sint Maarten i Ministerio Públiko di Kòrsou. E 4 akusadonan aki a keda akusá di ta involukrá den krimennan di e organisashon kriminal NLS. E krimennan tin di haber ku kasonan di asesinato, trafikashon di droga i labamentu plaka. Segun OM, tur e kuater akusadonan tabatin un kontakto direkto ku e lidernan di NLS ku ta Shurendy “Tyson” Quant i Urvin “Nuto” Wawoe.