WILLEMSTAD, — Durante di e siman di 25, 26, 27 i 28 di sèptèmber 2023, Kòrsou i otro paisnan rònt mundu ta selebrá e siman Internashonal Marítimo. Esaki ta kulminá riba Dia Internashonal Marítimo ku ta e delaster djaweps di sèptèmber di kual e aña aki ta kai riba 28 di sèptèmber.

Curaçao Ports Authority (CPA), Kompania di Tou Kòrsou (KTK), Curaçao Pilots Organization (CPO), Wardakosta i Citro a organisá diferente aktividat e siman aki pa konsientisá alumnonan di skolnan sekundario riba e importansia di e sektor marítimo i en partikular e trabounan ku e kompanianan aki ta hasi. Tur aña e Organisashon Internashonal Marítimo (IMO) ta selebrá Dia Internashonal Marítimo (World Maritime Day). Kada aña IMO ta para ketu na un otro tópiko di importansia pa e mundu marítimo. E tópiko di e aña aki ta “MARPOL at 50 – Our commitment goes on”. E tema ta reflehá e historia largu ku e organisashon aki a bin ta traha pe dor di protehá e medioambiente for di e impakto ku nabegashon tin pa medio di un marko regulatorio sólido i alabes enfatisá su kompromiso kontinuo ku un trabou asina importante.

Riba djamars 26 di sèptèmber Minister di Desaroyo Ekonómiko, Sr. Ruisandro Cijntje huntu Direktor di CPA, Sr. Humberto de Castro i tambe Minister Hato komo remplasante di Minister Charles Cooper di Tráfiko, Transporte i Planifikashon Urbano a hasi apertura di e Dianan Marítimo 2023 splikando alumnonan di diferente skolnan sekundario ki importansia nos medio ambiente tin pa e sektor marítimo na Kòrsou. Tambe e echo ku globalmente ta enfokando riba teknologianan nobo pa desaroyo di e mundu marítimo bira mas konsiente di nos medio ambiente. Despues di apertura ofisial, alumnonan por a subi riba un boto di tou di KTK ku fèri, skucha informashon di konduktor di fèri i tambe personal di Fort Nassau (Vessel Traffic Control Center), subi riba “cutter” Jaguar di Wardakosta i tambe “seadoo” di Citro i tambe a haña informashon di nos lotsnan pa medio di un presentashon pa skucha kiko nan trabou ta kontené. Komo outoridat portuario nos tambe ta kontinuamente enfoká i manehá loke ta na nos alkansá pa ku nos medio ambiente. Un di e resultadonan di esaki ta e echo ku pa algun aña kaba nos ta sertifiká ISO 9001 i 14001.