Fase 4 ta wanta un ratu segun e konsepto aktual di e presupuesto.

Punda,- For di promé konsepto di presupuesto di gobièrnu pa 2024, por nota ku Ministerio di Desaroyo Ekonómiko ta sigui ku konstrukshon di Marie Pampoen na 2025.

Despues ku na mei 2021 gobièrnu a anunsiá ku konstrukshon di fase 3 di Marie Pampoen ta kuminsá,
por nota ku na yüli 2023 e proyekto a hasi apertura ofisial. E proyekto ku a keda kordiná dor di CTB
tabata un éksito formal bou di pueblo di Kòrsou.

Despues ku e parke rekreativo a habri formalmente, por nota ku demasiado interakshon sosial ta
tumando lugá den e parke públiko i esaki por sierto ta un bon desaroyo pa e área. Muchanan di bario
tambe ku basta regularidat ta bishitá e área i asina otro muchanan di otro bario tambe ta sera amistat
ku konosí nan nobo. Tambe pa usa e fasilidatnan  ta totalmente grátis, pues tur rango di komunidat por
bishitá i disfrutá di e parke, kual ta algu balioso pa e sentido di komunidat na Kòrsou.

Por nota ku e promé konsepto di e presupuesto pa 2024 no a aloká fondo pa konstrukshon di fase 4 di
Marie Pampoen. E fondo lo bira disponibel pa aña 2025 i 2026. Segun e promé konsepto di e
presupuesto, por nota tambe ku pa 2025 Ministerio di desaroyo ekonómiko ta bai aloká 6 mion florin pa
konstrukshon i pa 2026 e ministerio lo aloká 3 mion pa finalisá e último fase di konstrukshon.

Segun e konsepto presupuestá, si tin sufisiente fondo disponibel, por kuminsá mas trempan ku fase 4 na
Marie Pampoen. Durante fase 4, gobièrnu lo bai konstruí 2 restorant, 2 tienda di sambuyá, lugá pa
stashoná outo i tambe lo ekstendé e playa di “Pier”.

Pa e área rekreativo di Zakito na Koredor e ministerio konserní si a aloká fondo pa finalisá e trabounan.
Segun e konsepto di presupuesto pa 2024, ainda falta alrededor di 4 aña di konstrukshon den e área
rekreativo. Pa 2024 a presupuestá 1 mion florin, pa 2025 i 2026 i 2027 e gobièrnu a presupuestá 9.9
mion repartí den e aña nan.

Área rekreativo Zakito tambe a bira un área bon bishitá pa siudadano nan.