Emmastad—Un konsultorio fiskalista renombrá na Kòrsou, a hasi un petishon mediante e dekreto LOB, pa risibi mas informashon riba eksonerashon di impuesto 2017. Esaki ta lokual fuentenan den seno di e ministerio di Planifikashon i Organisashon a señalá na Vigilante.

Mediante e dekreto di LOB, Dekreto Nashonal Riba Transparensha di Maneho, gobièrnu di Kòrsou ta obligá na entrega detayenan regradando e desishon di maneho na Ontvanger riba eksonerashon di impuesto.  E petishon pa mas klaridat ta un proseder lógiko di parti di e konsultorio, mirando e nesesidat di mas informashon pa alabes suministrá nan klientenan ku ta puntrando. E problema ta bira, kiko e ministerio di Planifikashon i Organisashon ta bai duna komo kontesta despues di konsulta ku Ontvanger di Kòrsou.

Segun minister di Finansas Públiko, Javier Silvania, Ontvanger ta “focus” riba kobransa di debenan di 2018 bai ariba. E maneho  ta enserá ku aanslagen di 2017 òf mas bieu lo no wòrdu kobrá aktivamente. No ta enserá ku a duna abolishon (“kwijtschelding”), pero ku Servisio di Impuesto ta konsentrá nan kapasidat limitá pa kobra aanslagnan mas yòn ku posibilidat mas haltu di kobransa, teniendo kuenta ku e 3  eksepshonnan:

1. Si esakinan a wòrdu imponé den kuadro di un investigashon penal fiskal;
2. Si e debe di impuesto di e añanan 2017 òf mas bieu ta suma NAf 1 mion òf mas i si Servisio di Impuesto tin informashon ku ta demostrá ku tin posibilidat di kobransa;
3. Si e debe di impuesto di e añanan 2017 òf mas bieu ya a ser pagá via di kuentanan di tersero (e asina yama derdenrekening manera entre otro di notarionan).

Segun Silvania, pa evitá ku e debenan di impuesto ta bolbe bira bieu i komo resultado insiguridat pa loke ta trata e kobransa di esakinan, Servisio di Impuesto a fihá diferente meta ku tin komo meta pa e organisashon kuminsá traha den aktualidat i mehorá e kalidat di servisio. E metanan aki ta entre otro: E entradanan di impuesto i primanan soshal ku Pais a risibi den e promé 4 lunanan di 2023 ta konforme presupuesto 2023 (presupuesto jan – aprel 2023: NAf 732,1 mion; entrada durante jan – aprel 2023: NAf 732,4 mion. Segun e minister, e maneho nobo no ta strobando Pais realisá su presupuesto 2023.

Den 2022 Kòrsou a kobra un kantidat record di NAf 2,1 bion repartí den NAf 1,28 bion na impuesto i NAf 770 mion na primanan soshal. E kantidat di NAf 1,28 bion ku a kobra na impuesto den 2022 ta NAf 213 mion mas tantu ku lokual a kobra na impuesto durante 2021 i NAf 175 mion mas tantu di lokual a presupuestá na entrada di impuesto den 2022. E kantidat di NAf 770 mion na primanan soshal ku  a kobra durante 2022 ta NAf 41 mion mas tantu ku lokual a kobra na primanan soshal durante 2021 i NAf 15 mion mas tantu di lokual a presupuestá den 2022.

E entradanan di impuesto i primanan soshal durante 2022 (NAf 2,1 bion) ta regardá prinsipalmente aangiften i aanslagen enkuanto aña 2018-2022 (92,3%: NAf 1,9 bion). E montante nominal ku supuestamente tin riba kaya pa kobra ta ketu bai NAf 5,7 bion, kual ta repartí den 130.000 Cribnummer. Tin hopi kaso di posibel “verjaring”, retrasonan atministrativo den prosesamentu di pagonan hasi na Ontvanger. 55.000 opheshon ku no a wòrdu kontestá ainda i un gran kantidat di taxatieve aanslagen, segun Silvania a hasi un kobransa efektivo kasi imposibel. Segun e minister, si ke husa e kapasidat limitá di un forma efektivo, mester stipulá prioridatnan pa ku kobransa di e montante nominal di NAf 5,7 bion. Un ekipo di eksperto a hasi vários análisis pa determiná di ki forma por redusí e kantidat di aanslagen ku mester wòrdu kobra di un manera responsabel i manehabel, teniendo kuenta ku e kapasidat limitá na belastingdienst. Den e kuadro aki a keda establesé ku e uso usual di “fecha di aanslag” (“dagtekening”) komo base pa priorisá, no ta kondusí na un kobransa optimal (esta manehabel i responsabel) kaminda por kobra mas ku ta posibel ku e kapasidat ku  tin. Segun Silvania, nan análisis interno a konstatá ku 90 % di entradanan di impuesto i primanan soshal tin di haber ku aangiften/aanslagen di máksimo 5 aña bieu (esaki ta kuadra ku investigashonnan internashonal di OECD). P’esei e la bisa ku no ta efektivo pa hinka kapasidat limitá den purba kobra debenan di mas ku 5 aña bieu. Pa redusí e kantidat di aanslag na un nivel manehabel i responsabel di moda ku belastingdienst por traha den aktualidat, Ontvanger a adaptá su maneho di kobransa. Esaki ta lokual Javier Silvania a presente den parlamento. Konsultorionan Fiskalista ta puntrando pa mas informashon riba e kambionan na Ontvanger.