E Rector Magnificus a duna un presentashon dje realidat finansiero dje universidat.

WILLEMSTAD – Parlamento lo sigui deliberá riba 28 di novèmber awó atrobe ku Rector Magnificus di Universidat di Kòrsou (UoC) Francis De Lannooy tokante retonan finansiero i tambe desaroyo lokal i internashonal ku ta hasi un impakto riba funshonamentu di universidat. E reunion ta planiá pa start 9’or di mainta.

Djaluna 28 di ougùstùs úlrimo, e reunion di Komishon Sentral a kuminsá ku un presentashon di parti di Delanooy. Despues di e presentashon, miembronan di Parlamento a hasi diferente pregunta den e úniko tanda. Presidente di Parlamento na dado momentu skòrs e reunion te un próksimo aviso, i a stipulá entretantu 28 novèmber komo e fecha di reanusashon dje reunion. Despues di e reunion di Parlamento, Parlamentario di frakshon di PNP Sheldru Osepa a bisa ku mester bini ku un minister spesial pa enseñansa i un sekretario di estado ku atenshon pa kultura i deporte.

UoC a trese dilanti durante e presentashon tantu e kantidat di studiantenan ku ta redusiendo, komo e kandidat di graduadonan ku ta finalisá tur aña. Osepa a trese dilanti ku e problema den UoC ta un problema di enseñansa i a balor ku ta duna na enseñansa avansá. Si tuma komo komparashon na Hulanda ta usa 15% di e presupuesto pa estudio avansa. Na Kòrsou esaki ta solamente 5%. Gobièrnu Hulandes ta invertí 14.000 euro pa studiante avansá tur aña. Na Kòrsou esaki ta mitar. “Tur esaki tin influensia riba e kalidat di estudio na Kòrsou.”

Ademas Osepa a trese dilanti ku e aksento den e ministerio ta fihá riba kultura i deporte i ménos riba enseñansa i siensia, miéntras deporte i enseñansa ta sòru pa fortifiká e sentimentu di union. “Pero enseñansa i siensia mester manda nos pueblo dilanti. P’esei nos tin ku pensa kon pa atendé esaki i kon pa pone sufisiente sèn pa atende e problemanan di universidat.”