Willemstad, — Djabièrnè 20 di òktober 2023 tabata un momentu spesial den presensia di Minister di Enseñansa, Siensia, Kultura i. Deporte, Sr. Sithree van Heydoorn, Representante di Minister di Desaroyo Ekonómiko den nòmber di Sra Mariella Olaria, Presidente di ADECK Sr Gabriel Magdalena i demas representantenan di ADECK, Stakeholdernan tripartite di Korpodeko, bestür i empleadonan di Korpodeko i demas invitadonan kaminda Korpodeko a lansa e buki digital yamá  ‘Guia pa Empresa Chikí’.

Chesron Isidora, CEO di Korpodeko,  duna palabra den kual el a  menshoná ku 35 aña pasá na 1988, Fundashon Empresa Chikí Kòrsou (FECK) a lansa un buki ‘Guia pa Empresa Chikí’den operashon ku Korpodeko. FECK tabata kai bou di Korpodeko i tabata duna guia i krédito na empresesanan chikí i mediano aki na Kòrsou. A modernisá e buki ‘Guia pa Empresa Chiki’ den kual a adaptá e konseptonan den e buki pa asina esaki por reflehá e merkado aktual. E buki lo ta uni kompletamente digital, pasombra Korpodeko tambe ke adaptá nan práktikanan sostenibel.

Por lo ménos mitar di e personanan ku ta bati na porta di Korpodekao ke sa kiko e organisashon por nifiká pa nan. Hopi biaha ta bini ku preguntanan manera por ehèmpel: “Kon mi ta kuminsá lanta mi negoshi, kon mi ta establesé mi preis, kiko mi tin ku hasi pa mi ta eksitoso, i kiko tipo di negoshi ta Korpodeko ta rekomendá pa lanta”. Chesron Isidora, CEO di Korpodeko, ta menshoná ku hopi tempu ta bai di parti di Korpodeko pa duna informashon.

E buki digital ta un forma den kual ta fasilitá e informashon ku Korpodeko ta kompartí ku su klientenan. E meta pa eduká empresarionan pero tambe pueblo en general. Den e buki aki tin hopi informashon nesesario ku hopi hende no ta para ketu riba dje. Ku e vershon nobo di e buki ke duna informashon ku ta aktualisá i tambe digitalisá. Chesron Isidora a menshoná ku konhunto ku ministerio OWCS, a hasi e buki disponibel pa dosentenan i skolnan. Chesron Isidora ta menshoná “laga nos wak s i nos por yuda krea empresario for di bankinan di skol.”

Randolf Gijsbertha, Vice Chairman di Korpodeko, tambe a hiba palabra den kual e a menshoná ku mester eduká empresarionan pa asina nan por ta fruktífero. Ta hopi importante pa por hasi un fiansa pero tambe mester sa kon pa manehá un empresa i parti di edukashon ta hopi importante. Randolf Gijsbertha ta menshoná ku si e empresa bai bon, nos komunidat tambe ta benefisiá for di esaki. E empresario mester ta bon duká pa partisipá aktivamente den ekonomia. No ke pèrdè kapital i pa motibu di esaki mester atkerí responsabilidat pa duna aporte den e parti di edukashon. Korpodeko ke ta e “trendsetter” den e parti di edukashon di nos hendenan.

Boy Magdalena, Presidente di Adeck, a menshoná ku menshoná ku e buki di guia ta mané un dash-board di outo pa bosa si bo tin gasolin, kon e outo ta kenta, si tin ku bai links of rèchts. Boy Magdalena ta menshoná, “si bo no tin un guia ta nifiká ku bo tin un outo sin dash-board”. E buki di guia aki lo sirbi sigur pa yuda empresarionan chikí i mediano pa ta eksitoso. Boy Magdalena, a menshoná e importansia pa stimulá espesialmente hóbennan for di skol pa asina e por haña e espíritu empresarial anto ku e buki lo tei, pa yega seka e personanan destiná ku mester di e guia aki.

Minister Sithree van Heydoorn, di ministerio OWCS,  a rekordá e hóbennan na Juan Pablo Duarte ku a haña lès di elèktrishèn. Tambe minister Sithree van Heydoorn a menshoná ku den e kuríkulo di edukashon, mester siña tambe, kon e hóben por bende su mes ora e tin su produkto. Segun minister Sithree van Heydoorn, e buki di guia aki ta pas den plan den pensamentu i den e plan di mehorashon di enseñansa kual ta spera ku lo bai lansa desèmber próksimo pa asina kambia sistema di enseñansa.

Minister Sithree van Heydoorn ta sigui menshoná ku hopi biaha hóben den fishi por ehèmpel, mester di e guia pa nan por desaroyá nan abilidat di fishi i nan abilidat di hasi negoshi. Minister Sithree van Heydoorn ke pa Korpodeko huntu ku Adeck, pensa riba kursonan kòrtiku i no teoria so, pa asina huntu ku e buki aki papia tokante kiko ta e opstákulonan ku nos empresarionan mester tene kuenta kuné ora kuminsá. Minister Sithree van Heydoorn, ta keda pendiente huntu ku Korpodeko i Adeck pa asina e hóbennan aki mester por siña tur lo ke nan mester sa pa guia nan empresa eksitosamente.

Sra Mariella Olario, representante di minister Cijntje a menshoná ministerio MEO tei pa fasilitá i yuda empresarionan. Den esaki tin un konsepto i plataforma “Mi Negoshi” den kual ministerio MEO ta hasi tur kos, den kual Korpodeko tambe ta aden. Sra Mariella Olario, ta menshoná ku e idea di e plataforma “Mi Negoshi” ta pa e miembronan por wak kiko falta den nos komunidat komo empresario i bin ku produkto. Esaki ta pa si miembronan hasi algu, gobièrnu no hasi mesun kos ku nan. Ta pa esaki sra Mariella Olario ta menshoná, ku ta sumamente kontentu ku Adeck a bini bek pa traha konhunto den e plataforma. Lo agregá  e guia di buki na e plataforma pa asina sigui informá i guia e empresarionan ku ta forma parti di e plataforma. 

Por download e buki ‘Guia pa Empresa Chikí’ta optenibel riba wèpsait di Korpodeko www.korpodeko.cw i Korpodeko su página sosial di Facebook i Instagram.