WILLEMSTAD – Korte den Apelashon resientemente a disidí den un kaso entre fundashon Korpodeko i un shofùr di bùs independiente, relashoná ku obligashonnan finansiero relashoná ku e finansiamentu di un bùs. Korpodeko a violá su deber di kuida e kliente (“zorgplicht”).

E kaso ta enfoká riba e shofùr di bùs independiente, kende a risibí finansiamentu di Korpodeko pa kumpra un bùs nobo. Sinembargo, e shofùr no a kumpli ku su obligashonnan di pago, kousando un disputa legal. Korpodeko a demandá pago di e debe pendiente, pero Korte den Promé Instansia a rechasá e petishon akí debí na e violashon di e deber di kuido di parti di Korpodeko.

Korte den Apelashon a revisá e kaso akí, despues ku Korpodeko a apelá kontra e desishon di Korte den Promé Instansia i a presentá kuater punto di apelashon. Sinembargo, Hòf no a risibí kontesta dje shofùr di bùs riba e puntonan akí. Despues di interkambio di argumentunan i dokumentonan adishonal, a demandá sentensia.

T’asina ku dia 1 di sèptèmber 2006, Korpodeko a duna e shofùr di bùs un fasilidat di krédito di 13 mil florin pa kumpra un bùs segunda mano di Mitsubishi, ku un interes akordá di 8%. Den promé instante e dama tabata paga 195 florin pa siman, i e debe a baha te ménos ku 10 mil florin na yüli 2007. Despues di esaki e dama a haña un fiansa adishonal di 17 mil florin pa un otro bùs riba 23 di yüli 2007.

Despues di diferente pago, e debe a baha for di mas o ménos 31 mil florin te alrededor di 18 mil florin ougùstùs 2007 i yüni 2010. Fin di 2010 e dama a mèldu ku su di dos bùs a para i ku e tabata hür un bùs pa 3.297,50 florin pa luna. Su debe a subi for di alrededor di 18 mil florin te kasi 20 mil florin entre yüni 2010 i desèmber 2011. For di febrüari 2012 te desèmber 2013 no tabatin pago, despues el a bolbe tuma e interes di nobo, poniendo ku e debe a subi te mas o ménos 18 mil florin na desèmber 2014.

Na 2014 e dama tabata ke kumpra un bùs nobo, un Toyota Hiace. El a yena un formulario yamá “Korpodeko VERMOGENSOPSTELLING”. E bienestarnan total tabata mas o menos mil florin i e debe tabata inkluí un fiansa eksistente di 18.014,91 florin i e debe di impuesto di mas o ménos 16 mil florin. Riba 31 di desèmber 2014, Korpodeko a ofresé e dama un fiansa nobo di 78.450 florin pa kumpra e Toyota, ku un interes di 8% i un hür anual di 1.630 florin pa luna. A deskontá e debe bieu te na 18.475,62 florin.

Entre mart 2015 i yüli 2016, e debe a baha te mas o menos 65 mil florin, pero e banko a manda diferente karta rekordando pago (“aanmaningen”) na yüli i ougùstùs 2016. E dama a paga diferente suma, pero su debe a baha te mas o ménos 54 mil florin na yüli 2017. Despues di esaki, nan a pidi pa e paga 1.630 florin pa luna, pero tin biaha e tabata paga ménos. Su debe a baha te mas o ménos 48 mil florin na yanüari 2018.

For di mart 2019 te yanüari 2021 e dama a keda paga, resultando den e echo ku su debe tabata fluktua entre 44 mil i 35 mil florin. Na yüni 2019, Korpodeko a subi e fiansa te ku 1.604,84 florin pa e seguro dje Toyota. Na yanüari 2021, Korpodeko a bende e Toyota pa 23.771 florin, i asina a sobra 16.063,87 florin na debe. Despues di esaki, Korpodeko a hiba e dama dilanti Korte i a demandá pago di 16.511,20 florin pa e debe pendiente pa 31 di mei 2021, miéntras e dama a pidi den un kontra-demanda un pago di 54 mil florin komo kompensashon di daño inmaterial.

Hòf a evaluá e echonan te den detaya despues dje sentensia di Korte den Promé Instansia i a konkluí ku Korpodeko a violá su deber di kuido pa ku e shofùr di bùs, dor di no pidi i risibí informashon adekuá promé ku nan a duna e fasilidat di krédito. Esaki a kousa un riesgo real di demasiado krédito. Hòf a dikta ku e daño di e shofùr di bùs komo konsekuensia di e violashon akí di deber di kuido ta mínimo igual na e suma demandá pa Korpodeko. Hòf a konfirmá e sentensia di Korte den Promé Instansia, rechasando e petishon di Korpodeko, i a kondená Korpodeko pa paga e gastunan di apelashon tambe. E shofùr di bùs su gastunan ta kalkulá na sero, pasó e no tabatin representashon legal di un abogado.