Ruisandro Cijntje, minister di Ekonomia.

Punda—Bankonan komersial mester suavisá kondishonnan di fiansa, tantu fiansa personal komo komersial. Esaki debí ku tantu sektor públiko komo sektor priva a entrega entrada, nifikando ku gastunan fiho na nivel personal komo komersial mester baha. Unu dje gastunan fiho tantu na nivel di gastamentu doméstiko i komersial, ta e kota mensual di pago na bankonan lokal.

 E sektor finansiero ta kontribuí kasi mesun tantu ku e sektor públiko na e Produkto Nashonal Brutu. Entre 2015 pa 2018, sektor públiko a kontribuí en total 2.58 miar florin miéntras sektor finansiero 2.59 miar, kual ámbos ta duna un promedio di kasi 659 mion anual. Pero ta lógiko ku bou di Covid, ámbos sektor,  nan kontribushon a baha konsiderablemente. Prinsipalmente sektor bankario/finansiero mester bira mas fleksibel i instituí kreatividat den nan maneho si nan kier na promé lugá limitá pèrdida pero tambe kontribuí pa flèksibilisa e gastunan fiho na nivel doméstiko i komersial.

Mas di 80% di kompanianan chikitu i mediano ta konfrontando problema ku demanda i mester baha gastunan operashonal. Esaki kombiná ku un demotivashon serka empleadonan debí na retiro òf bahada den salario, no tei yuda muchu. E preshon riba likides di e kompanianan chikitu i mediano ta oumentá di tal grado ku Kòrsou lo konosé e promo liña di bankarota. Na Hulanda korte a anunsiá ku pa 2022 tabatin ménos bankarota okashoná pa efektonan di Covid. E desaroyo di yega na bankarota por kousa un efekto di dominó kousando mas difikultat den otro sektornan komersial. Konsekuente e kantidat di fiansanan komersial den “default” (inkumplimentu) lo oumentá, bahando asina e kontribushon di sektor finansiero na e Produkto Nashonal Brutu. 

Pa fiansanan personal mesun argumentashon ta bálido, ku eksepshon entradanan personal lo baha kolektivamente na Kòrsou. Sea aseptá of no, e forsa laboral den un empleo na e momentunan aki alrededor di 43 mil persona, mester entrega. E 12.5% den sektor públiko i 20% den sektor priva, mester igualá pa no krea un desbalanse den nivel di bida. Introdukshon di bahamentu di gastu den salario tantu den sektor públiko (4 mil persona) i sektor priva (39 mil persona) tei baha e forsa di kompra, konsiderando ku bankonan komersial lo no fleksibilisa pagamentu di kota mensual. Esaki ta konkluí ku tantu na nivel di fiansa komersial, personal/hipotek, tardi òf tempran e sektor finansiero lo konfrontá su mes ku efektonan di Covid.